Miodraq Bojoviç dekabrın 24-də «Neftçi»nin baş məşqçisi olmasını təsdiqləyən sənədə qol çəkdi.
Yanvarın əvvəlində, Antalya toplanışının gedişində bir açıqlama verdi.
Dedi ki, komandanı optimal formaya qaytarmaq üçün ona 6 həftə kifayətdir.
İki gün öncə, «Araz-Naxçıvan»la Premyer Liqanın 22-ci tur matçının ardından bu dəfə dedi ki, istədiyi oyunu sərgiləmələri üçün daha 1 aya ehtiyacları var.
Göründüyü kimi, o, vaxt «uda-uda» gedir, «Neftçi» isə udmur, uduzur. Qarşısına çempionluq vəzifəsi qoyulan baş məşqçi axır 2 turdakı yenilgiləri izah etməyə heç düz-əməlli səbəb gətirə bilmir.
Fikir verin, hələ də «donu açılmayıb», oyunlar vaxtı lal-dinməz dayanır texniki zonada. Səsi də çıxmır ey!
Bu, çox şeydən xəbər verir. Eləcə də gələcəyini «Neftçi»də görməməsindən.
Uzun illər Rusiyada müxtəlif klubları çalışdırmış Bojoviç özünü Bakıda qərib kimi aparır. Sanki uyğunlaşa, istədiyini tapa bilmir.
Monteneqrolunun ilk həftələrdəki o pozitivliyindən, şux görkəmindən əsər-əlamət qalmayıb. Belini bükə-bükə gəzir.
Daim qayğılı, fikirli, narahat görünür. Əllərini arxasında gizlədir, gözləri yol çəkir.
Hərdən sifətini ovuşdurur, təəccüblə meydanı süzür. «Ay Allah, mən hara düşmüşəm…» deyir baxışları.
ELNUR