"Bu komanda oynamağı bacarır, potensialı var":

"Bu komanda oynamağı bacarır, potensialı var": FOTOLAR

Azərbaycan Premyer Liqasında XIX turun ikinci oyun gününə start verilib. “Qəbələ” Bakıda “Zirə”nin qonağı olub.

“Qırmızı-qaralar”ın çalışdırıcısı Elmar Baxşıyev ötən turla müqayisədə start heyətində 6 dəyişiklik edib. Anar Nəzirov, Asif Məmmədov, Merab Qiqauri, Fernan Lopez, Nikolas Raysel və Rövlan Muradov “11-lik”də yer alıb. Onlar Tərlan Əhmədli, Ülvi İsgəndərov, Sadiq Quliyev, Ehtiram Şahverdiyev, Abdelrafik Jerar və İdris İnqilablını əvəzləyib.

Qarşılıqlı hücumlarla başlayan oyunun ilk dəqiqələrindən “qırmızı-qaralar” daha fəal təsir bağışlayıb. Lakin futbolçularımız rəqib qapısı önündə real qol vəziyyəti yaramaqda çətinlik çəkib.

Hesab hissənin ortalarında açılıb. Meydan sahibləri İlkin Muradovun qolu ilə önə keçib. Buraxılan topdan az sonra Fernan Lopezin cərimə meydanı xəttinin yaxınlığından zərbəsi yaddaqalan olub.

Hissənin sonlarında komandamız hücumlarının sayını artırsa da, həmlələri kəsərli alınmayıb. Nikolas Rayselin əlverişli mövqedən zərbəsi zamanı top qapı tirinin üstündən keçib.

İkinci hissəyə “Zirə” daha fəal başlayıb. Bu dəqiqələrdə müdafiədə etibarlı oyun nümayiş etdirən “qırmızı-qaralar” hissənin ortalarından üstünlüyü ələ keçiriblər. Daha çox hücum edən komanda Rövlan Muradovun baş zərbəsi zamanı qola yaxın olub. Lakin top müdafiəçilərdən dönüb.

Matç sona yaxınlaşdıqca rəqib qapısına təzyiqi də artırıb. Uzaqdan çərçivə önünə ötürmə zamanı tirdən qayıdan topa toxunan Fernan Lopez matçda tarazlığı bərpa edib.

Bu qoldan ruhlanan “Qəbələ” daha bir dəfə fərqlənməyi də bacarıb. Bu dəfə də uzaqdan zərbə qolla nəticələnib. Rövlan Muradov qapını dəqiq nişan alıb. Son dəqiqələri qarşılıqlı hücumlarla keçən matçın sonluğunda hesab dəyişməyib. Beləliklə, “qırmızı-qaralar” Bakı səfərində əzmkar qələbə qazanıb.

“Qəbələ”nin çalışdırıcısı Elmar Baxşıyev: “Qış fasiləsindən sonra həm biz, həm də “Zirə” çətin durumda idik. Lakin göstərdiyimiz futbol qarşıda daha yaxşı çıxış edəcəyimizə inam verirdi. Sadəcə nəticələr yox idi. Nümayiş olunan oyun məni də, bütün məşqçilər korpusunu da qane edirdi. İnanırdıq ki, şans da bizim tərəfimizdə olacaq. Sevinirik ki, bu oyunda istədiyimizi meydanda görə bildik. Matçı hissələrə bölməzdim. İlk yarıdakı oyundan çox məmnun qaldım. Verilən tapşırıqlar daha yaxşı icra olunurdu. Fasilədən sonra riskli oynamağa ehtiyac yarandı. Hesabda geridə idik. Komandanın üzərinə daha çox yük düşürdü. Sevinirəm ki, futbolçular bunun altından yaxşı çıxdılar. Abdelrafik Jerar məşqdə zədəli olduğu üçün meydana çıxmadı. Bu komanda oynamağı bacarır, potensialı var. Qışa qədər necə təhlükəli, necə baxımlı oynaya bildiyimizi göstərdik. Fasilədə bizi tərk edənlər oldu. Onların yerinə gələnlər elə vaxt qoşuldular ki, müəyyən vaxta ehtiyac var idi. İnanıram ki, getdikcə komanda daha yaxşı olacaq və məzmunlu oynayacaq. Rasim Ramaldanov artıq komanda ilə məşq edir. Altı ay meydandan kənarda qaldığı üçün ona da vaxt lazımdır”.

“Zirə” – “Qəbələ” 1:2

Zirə İdman Kompleksinin stadionu, 200 tamaşaçı

Baş hakim: Orxan Məmmədov

Baş hakimin köməkçiləri: Elşad Abdullayev, Vüqar Bayramov

Dördüncü hakim: Rəşad Əhmədov

Hakim-inspektor: Ceyhun Haşımov

AFFA nümayəndəsi: Ramiz Mustafayev

Sarı vərəqələr:Davit Volkov, 34 (qeyri-idman hərəkəti); Boyan Zoqoviç, 71 (hakimin qərarına etiraz);Nicat Süleymanov, 74 (hakimin qərarına etiraz); Adrian Skarlatake, 87 (qeyri-idman hərəkəti) // Asif Məmmədov, 27 (qeyri-idman hərəkəti); Tərlan Əhmədli, 80 (qeyri-idman hərəkəti)

Qollar: İlkin Muradov, 21 // Fernan Lopez, 79; Rövlan Muradov, 88

Artırılan vaxt: I hissədə 3 dəq.; II hissədə 3 dəq.

“Zirə”

1. Orxan Sadıqlı

8. İlkin Muradov

4. Elvin Camalov

10. Ağabala Ramazanov

33. Yovan Krneta

27. Adrian Skarlatake (k)

43. Riçard Qadze

3. Ali Sisey

18. George Anton