"Hər görüşə qələbə üçün çıxırıq. Bu oyunda da istəyimiz çox idi.
Matça çox ciddi hazırlaşmışdıq. Qələbə də qazana bilərdik. Sadəcə, şanslarımızı dəyərləndirə bilmədik".
Bunu Sportinfo.az-a açıqlamasında "Qarabağ"la bərabərə bitən (0:0) matç haqqında danışan "Keşlə"nin yarımmüdafiəçisi Rafael Məhərrəmli deyib.
Qazanılan bir xal "Keşlə"nin qış fasiləsindən sonrakı ilk xalı oldu. Məhərrəmli belə uğursuz çıxışın daha çox təqvimlə əlaqəli olduğunu bildirib:
"Bu ay bizim oyun qrafikimiz çox ağır idi. Güclü rəqiblərlə oynadıq. Zədəli və xəstə futbolçularımız oldu".
O, hər şeyə rəğmən, "Qarabağ"la oyundakı uğurlu nəticəni davam etdirməyə çalışacaqlarını sözlərinə əlavə edib:
"Bütün çətinliklərə rəğmən, hər oyuna yüksək motivasiya ilə çıxırıq. İstəyimiz bu bərabərliyin davamı olaraq uğurlu seriya yaxalamaqdır".
XANOĞLAN
