"Məncə, bu matçla bağlı çox şey danışmağa ehtiyac yoxdur. Çünki "Qarabağ"ın adı, gücü hər kəsə bəllidir".
Bunu Sportinfo.az-a açıqlamasında "Keşlə"nin üzvü Tərlan Quliyev bu gün baş tutacaq "Qarabağ"la oyun barəsində danışarkən deyib.
Təcrübəli oyunçu qarşılaşmaya tam güclə hazırlaşdıqlarını, amma ağır oyuna ciddi problemlərlə çıxacaqlarını bildirib: "Bu rəqibə qarşı bütün komandalar 100% gücü ilə hazırlaşır. Biz də həmçinin. Sadəcə bizdə problemlər çoxdur. Geniş danışmaq istəməzdim. Buna görə də görüş çox ağır keçəcək. Qış fasiləsindən sonra "Qarabağ"la üçüncü oyunumuzdu. Bu baxımdan bir-birimizi çox yaxşı tanıdığımızı deyə bilərəm".
"Köhlən atlar" bir neçə gün əvvəl Konfrans Liqasında ağır məğlubiyyət aldı. Belə ki, komanda Fransa "Marsel"nə doğma meydanda böyük hesabla (0-3) uduzaraq turnirdə mübarizəni dayandırdı. Bu məqam Qurban Qurbanovun yetirmələrində müəyyən psixoloji düşkünlük yarada bilər. Amma Quliyev bu ehtimalı yaxın buraxmadı:
"Bəli, rəqib "Marsel"ə 3-0 məğlub olaraq avrokuboklarla vidalaşdı. Ancaq Qurban müəllimi yaxından tanıyan biri kimi deyə bilərəm ki, komandası bu gün həmin məğlubiyyəti unutdurmaq üçün meydana çıxacaq".
XANOĞLAN
