DÇ-2022-nin seçmə mərhələsi çərçivəsində keçirilən Ermənistan - Rumıniya oyunu (3:2) zamanı stadionun tribunasında separatçı rejimin qondarma bayrağının asıldığını məlumat vermişdik.
Hadisədən çox keçməmiş AFFA bununla bağlı FİFA-ya müraciət ünvanlayacağını rəsmi olaraq açıqladı.
Görəsən, beynəlxalq qurum tərəfindən Ermənistan Futbol Federasiyasına nə kimi cəza verilə bilər? FİFA-da gözlənilən cavabı alınmasa, AFFA başqa hansı addımları atmağı düşünür?
Sportinfo.az-a açıqlamasında AFFA-nın Mətbuat və İctimaiyyətlə Əlaqələr şöbəsinin müdiri Firuz Abddula bütün bu suallara belə aydınlıq gətirib:
"Hüquqi şöbə məsələ ilə bağlı müraciəti artıq hazırlayıb və FİFA-ya göndərib. FİFA-nın 210 ölkəsi var.
Bir gün ərzində, təbii ki, bizə reaksiya verilməyəcək. Komissiya baxandan sonra AFFA-ya cavab veriləcək.
Bu, hüquqi prosesdir. Normal cavab verilməməsi böyük ölçüdə mümkün deyil. Yarışın əsasnaməsinə uyğun cavab verməyə borcludular".
