UEFA Fitness B kateqoriyasına malik azərbaycanlı mütəxəssis “Araz-Naxçıvan”da
Azərbaycanlı fiziki hazırlıq üzrə mütəxəssis Toğrul Bilallı karyerasını “Araz-Naxçıvan”da davam etdirəcək.
UEFA Fitness B və UEFA B məşqçi kateqoriyalarına malik olan Toğrul Bilallı “Araz-Naxçıvan”ın yeni fiziki hazırlıq üzrə məşqçisi təyin olunub.
Toğrul Bilallı son üç ili “Zirə” Futbol Klubunun əvəzedici komandasında keçirib. Bu müddətdə o, komandanın fiziki hazırlıq prosesində, futbolçuların fərdi inkişafında və performans göstəricilərinin artırılmasında yaxından iştirak edib.
Məlumata görə, cari mövsüm ərzində Bilallıya “Kəpəz” və “İmişli” kimi peşəkar futbol klublarından da təkliflər olub. Lakin mütəxəssis yekun qərarını “Araz-Naxçıvan”ın xeyrinə verib.
Beləliklə, Toğrul Bilallı yeni mövsümdən etibarən “Araz-Naxçıvan”ın baş məşqçisi Cavid Hüseynovun məşqçilər korpusunda fiziki hazırlıq üzrə məşqçi kimi fəaliyyət göstərəcək.
SPORTİNFO.AZ
