“Rusiyanın Qarabağı yenidən işğal etməsi” fikrini yayanlar

7 May 14:10 Araşdırma 537
“Rusiyanın Qarabağı yenidən işğal etməsi” fikrini yayanlar

“Rusiyanın Qarabağı yenidən işğal etməsi” fikrini yayanlar son vaxtlar yenidən fəallaşıblar.

Burada Milli Şura və Müsavat Partiyası daha fəal görünür. Hər iki qurumun rəhbərləri deyirlər ki, Rusiyanın işğalçılıq siyasəti Qarabağda davam edir.

İqtidara barışmaz mövqedə dayanmış inkarçı cinah torpaqların azad edilməsini tam və birmənalı gözdən salır, bu faktı gizlətməyə çalışır. Bir sözlə Azərbaycanın qələbəsini danmaqla məşğuldurlar. İqtidar tərəfdarları isə bu iddianı yaxına buraxmır. Azərbaycanın rəsmi siyasəti isə hələlik ermənilərin Azərbaycan qanunları altında yaşamadığı Xankəndi, Xocalı, Xocavəndin bir hissəsində də idarəçiliyimizin reallaşacağını bildirirlər...

Milli Dirçəliş Hərəkatı Partiyasının sədri, sabiq deputat Fərəc Quliyevin sözlərinə görə, belə fikirlər o şəxslər tərəfindən irəli sürülür ki, sərbəst mövqeləri yoxdur: “Bəziləri heç bilmir ki, məqsədləri nədir. Vətən müharibəsi günlərində məcburiyyət qarşısında qalıb cəmiyyətə bunun qələbə olduğunu deyirdilər. İndi isə belə mövqe ortaya qoymaqla əslində təkcə uğurlarımıza kölgə salmırlar, nailiyyətlərimizin davamına da mane olmağa çalışırlar. Yaxşı bilirlər ki, indi çox ciddi savaş dönəmidir. Amansız bir savaş gedir. Bu məsələlərdə Azərbaycan tərəfi qardaş ölkə Türkiyə ilə birlikdə bütün basqılara rəğmən heç bir güzəştə getmir. Müharibə günlərində hərbi savaş görünən tərəf idi. Bir yer azad edilirdi, hər kəs bunu görürdü. Siyasi savaşın isə görünməyən tərəfləri var. Əlbəttə, Qarabağdakı rus sülhməramlıları ilə bağlı çox ciddi suallarımız var. Ona görə ölkə prezidenti də, iqtidar nümayəndələri də, deputatlar da, jurnalistlər də bu məsələdən kənarda durmurlar. İradlar bildiririk. İstəyirik ki, sülhməramlılar səlahiyyət çərçivələri daxilində davransınlar. Amma hər kəs yaxşı bilir ki, indiki vaxtda rus sülhməramlılarının Qarabağda olması nə hökumətin, nə də cəmiyyətin günahı deyil. İndiki şərtlər daxilində bu mövcudluq oldu. Biz indi ona çalışırıq ki, onlar bizim işlərə qarışmasınlar, razılaşmanın bütün bəndlərinə əməl olunsun. Xüsusilə, 10 noyabr bəyanatındakı dördüncü bəndə əməl olunmasını daha çox istəyirik.

Fərəc Quliyev: Hamımız Azərbaycan Prezidentinin yürütdüyü real, praqmatik  və uğurlu siyasəti dəstəkləməliyik

Fərəc Quliyev: “Kimsə qələbəmizə kölgə sala bilməz”

Bu da erməni silahlılarının ərazilərimizdən çıxarılması ilə bağlıdır. Eyni zamanda, BMT və digər strukturların nəzarəti altında Xankəndindən qovulmuş 12500 və digər ərazilərdən qovulmuş insanlarımız geri qaytarılmalıdır. Bu da mümkünsüz deyil. İradları bir daha deyirəm ki, prezident başda olmaqla hamımız bildiririk. Amma istənilən halda kimsə qələbəmizə kölgə sala bilməz. Biz 44 gün ərzində 30 illik həsrətimizə son qoymuşuq. Bu gün Azərbaycan Ordusu hər şeyi kontrol edib. Amma bütün hallarda ordumuz Xankəndinə, erməni əsilli dinc vətəndaşlarının olduğu ərazilərə tankla, topla girə bilməzdi. Hansı tələnin hazırlandığı məlum idi. Xatırlayırsınızsa, 70-ə qədər xarici jurnalisti orada saxlamışdılar. Mindən çox dinc vətəndaşı da orada saxlamışdılar ki, burada niyyət bəlli idi. PKK və ASALA-nın qalıqları orada jurnalistləri və erməni əsilli azərbaycanlıları öldürməli idilər. Müharibənin getdiyi günlərdə BMT Təhlükəsizlik Şurasında Azərbaycanın məsələsini qoymaq istəyirdirlər. Sadəcə Böyük Britaniya bu məsələyə mane oldu. Biz ora siyasətlə girəcəyik və bunu da bacaracağımıza əminik. Bütün ərazilərimizi tamamilə işğaldan azad edəcəyik. Proses gedir və bir dəqiqə də dayanmır”.

F.Quliyev fikirlərinə bu cür davam etdi: “İndi ən təhlükəli olan odur ki, görülən işlərə rəğmən, Ali Baş Komandan müxtəlif dövlətlərin tör-töküntüləri tərəfindən böhtana məruz qalır. Bir vaxtlar şəhid ailələri ilə dövlət arasında çat yaratmağa çalışdılar, xüsusilə, dəfn mərasimləri ilə bağlı olaraq. Sonradan qazilərlə dövlət arasında çat yaratmaq cəhdlərinin şahidi olduq. İndi də bu cür cəhdlər edirlər. Qələbəmizi gözdən salmaq istəyirlər. Təsəvvür edin ki, Qələbə parkı açdıq, bunu belə gözdən salmağa çalışdılar. Fransa kimi dövlətdə Əlcəzairdə öldürdükləri hərbçilərin kəllə sümüklərini göstərirdilər. Onlar haqqında söz deyə bilməyənlər Azərbaycana hücum edən ermənilərin dəbilqələrinə görə hay-küy salırlar. Bu yanaşmalar qərəzlidir. Sadəcə diqqəti əsas işlərdən kənara yönəltməyə cəhd edirlər. Sülhməramlıların fəaliyyəti cəmiyyətin nəzarəti altında olacaq və qısa zamanda əminəm ki, onların çıxarılmasına nail ola biləcəyik. Bu qüvvələr iqtidara gəlmək üçün bütün yollara əl atmağa çalışacaqlar. Amma heç nəyə nail ola bilməyəcəklər”.

Aydın Mirzəzadə:

Aydın Mirzəzadə: “Bu, cəmiyyəti çaşdırmaq istəyidir”

YAP-çı deputat Aydın Mirzəzadə MŞ və Müsavatın fəaliyyətinə təəccüblənmir: “Radikal müxalifətin Vətən müharibəsindəki mövqeyinin hər kəs şahidi oldu. Cəmiyyət ağrılı, milli problemimizin həllinə şahidlik etdi. Bu gün birmənalı şəkildə ictimaiyyət cənab prezidentin apardığı siyasi kursu dəstəkləyir. Radikal müxalifətin artıq siyasi səhnədə yeri görünmür. O özü-özünü təcrid edib. Bu gün yenidən gündəmə gəlmək yaxud kiçik də olsa elektorat qazanmaq üçün ortaya uydurulmuş mövzular atırlar. Bunlardan biri də guya Rusiyanın bölgəyə birdəfəlik gəlməsi, Dağlıq Qarabağın yenidən itirilməsi barədədir. Ağıla sığmayan ideyalardır. Hesab edirəm ki, bu, cəmiyyəti çaşdırmaq istəyidir. Özlərininmi istəyidir, kənardan tapşırıq alıblar, bu başqa mövzunun söhbətidir. Onlar ilk növbədə, 10 noyabr və 11 yanvar sazişlərinin mətni ilə tanış deyillər. Rusiya bura 5 il müddətinə Azərbaycanın razılığı ilə gəlib. Azərbaycan müddətin başa çatmasına 6 ay qalmış həmin sülhməramlıların bölgədən çıxarılması tələbini irəli sürə bilər. Digər məqam ondan ibarətdir ki, bu gün Azərbaycan Zəngəzur dəhlizinin açılması üçün danışıqları əsasən şimal qonşusu ilə aparır. Çünki Ermənistan sərhədlərini rus hərbçiləri qoruyur. Azərbaycan məsələlərini mərhələ-mərhələ həll edir. Cəmiyyəti çaşdırmaq, Azərbaycan yaxın münasibətlərinin olduğu şimal qonşusu ilə münasibətləri korlamaq cəhdləri açıq-aydın hiss edilməkdədir. Ancaq bunlar əbəsdir. Heç vaxt bu niyyət baş tutmayacaq. Azərbaycan cəmiyyəti erməni tərəfin təxribatlarının hər birinin qarşısının alındığını görür. Radikal müxalifətin Rusiya ilə münasibətlərin korlanması üçün atdığı addımların heç bir təsiri olmayacaq”.

Cavanşir ABBASLI

Xəbər Lenti
23 İyun 13:40 Kapitan 1 il də qaldı