Avropa Liqasının qrup mərhələsinin III turunda oktyabrın 24-də Bakıda "Qarabağ"ın qonağı olacaq APOEL-də bəzi futbolçular baş məşqçi Tomas Dolldan narazıdır.
Sportinfo.az yerli mətbuata istinadən xəbər verir ki, onlardan biri komandanın aparıcı üzvü Musa Əl-Tamaridir. İordaniyalı yarımmüdafiəçici dünən Kipr çempionatının VI turunun "Doksa" ilə oyununda əvəzlənməsinə etirazını bildirib. 22 yaşlı vinger "İnstagram" hesabında paylaşım edərək, almaniyalı məşqçiyə söz atıb:
"Bütün bunlar məni daha da güclü edir. Qulaq as, mən toxunulmazam! Hər gün özümə söz verirəm ki, daha yaxşısını edəcəm və bu vədi heç vaxt pozmayacam. Hər zaman özümə güvənirəm".
Qeyd edək ki, Tamari "Doksa" ilə matçda zəif təsir bağışladığı üçün 65-ci dəqiqədə Antonio Jakolislə əvəzlənib.