24-cü turda autsayder “Karvan-Yevlax”ı çətinliklə - 2:1 hesabı ilə məğlub edən “Araz-Naxçıvan” çərşənbə günü Şamaxıda meydana çıxacaq.
Avrokuboklara vəsiqə uğrunda mübarizə aparan Naxçıvan təmsilçisini bölgədə kifayət qədər ciddi sınaq gözləyir.
İddialı rəqiblərə badalaq vurması ilə ad çıxaran “Şamaxı” son 5 oyunda məğlub olmayıb. 4 dəfə bərabərə qalıb, ötən həftə səfərdə “Sumqayıt”ı udub.
“Araz-Naxçıvan”ın təcrübəli futbolçularından olan keçmiş “Qarabağ”lı Patrik Andrade Sportinfo.az-a açıqlamasında qarşıdakı matçla bağlı fikirlərini dilə gətirib:
“Şamaxı”ya qarşı oynamaq bütün komandalar üçün çətindir. Müdafiədə sıxlıq yaradıb, əks-hücumlarda təhlükəli olurlar.
Hər iki komanda üçün çətin oyun olacaq. İlk dövrədəki görüşdə hesabı bərabərləşdirib 1 xal qazanmışdıq.
Qış fasiləsi ərəfəsində isə 2:0 məğlub etmişdik. Hər iki qarşılaşma maraqlı alınmışdı.
Baş məşqçinin tapşırıqlarını düzgün yerinə yetirməklə 3 xal üçün mübarizə aparacağıq.
İndiki vəziyyətdə qələbələrə ehtiyacımız var. Bunun üçün gücümüzün olduğunu düşünürəm”.
Martın 18-də Şamaxı şəhər stadionunda baş tutacaq oyunun start fiti saat 15:00-da çalınacaq.
HƏBİB
.jpg)
