Qış fasiləsindən sonra ilk qələbəsini 20-ci turda qazanan “Araz-Naxçıvan” növbəti 3 xalın arzusundadır.

Andrey Demçenkonun rəhbərlik etdiyi kollektiv səfərdə “Karvan-Yevlax”ın qonağı olacaq.

Yevlaxlılar 6 xalla turnir cədvəlinin sonuncu pilləsində qərarlaşmasına baxmayaraq, “Zirə”ylə səfər qarşılaşmasında yeganə qolla uduzaraq mübarizliyini ortaya qoydu.

Üstəlik, alışdıqları süni örtükdə, doğma azarkeşlərinin önündə oynayacaq.

“Karvan-Yevlax” – “Araz-Naxçıvan” matçından əvvəl Sportinfo.az-a danışan 34 yaşlı Ramon Maçado komandasının iddiasından söz açıb:

“Ardıcıl 3 oyunluq uğursuz nəticələrdən sonra vacib olan qələbə idi ki, onu da “Sumqayıt”ı məğlub etməklə qazandıq. İndi komandada yüksək ab-hava hökm sürür, psixoloji durum yaxşılaşıb.

“Karvan-Yevlax”ın öz meydanında oynaması onlar üçün üstünlükdür. Azarkeşlərin qarşısında uğursuzluğa son qoymaq istəyirlər. Qələbə qazanmaq üçün riskə getdəcəklər.

Üstəlik, süni örtükdə oynamağa alışıblar. Biz isə təbii qazondan istifadə edirik.

Bundan sonra heç-heçəni, yaxud məğlubiyyəti düşünməyə vaxtımız yoxdur.

Məqsədimiz növbəti qələbəni qazanıb, avrokuboklara vəsiqə uğrunda mübarizəni davam edirməkdir. Komanda olaraq birlik nümayiş etdirməklə qələbə qazanacağımıza inanıram”.

Fevralın 21-də Yevlax şəhər stadionunda baş tutacaq qarşılaşmanın start fiti saat 14:30-da çalınacaq.

HƏBİB