"Araz Naxçıvan"ın yarımmüdafiəçisi Şarl Boli Premyer Liqanın 17-ci turunda "İmişli" ilə bərabərliklə bitən (2:2) görüşdən sonra Sportinfo.az-a müsahibə verib.
- Oyunla bağlı nələr deyə bilərsən?
- Çətin matç oldu. Belə meydançada öz oyunumuzu oynamağa çalışdıq. Təəssüf ki, bu gün iki xal itirdik. Oynamaq çətin idi. Artıq görüş geridə qaldı, istirahət edib növbəti oyunlara hazırlaşmaq lazımdır.
- İki dəfə geri düşdüyünüz oyunda bərabərlik qolunu vura bildiniz. Bəs qələbə üçün nə çatmadı?
- Oyun boyu fikrimiz qələbə idi. İki dəfə ani diqqətsizlikdən qol buraxdıq. Qələbə üçün 90 dəqiqə görüşə fokuslanmaq lazımdır.
- Meydança kənardan futbol oynamaq üçün qorxulu görünürdü...
- Bəli, elədir. Oyunda öncə də bilirdik ki, bizi bu çətinlik gözləyir. Bu tip meydanlarda döyüşmək tələb olunur. Biz də bunu etdik. Görünür, kifayət deyilmiş.
- Yeni baş məşqçi Demçenkonun istəyi, tələbi nədən ibarətdir?
- Onun fikirləri çoxdur. Oyunçular arasında əlaqələri gücləndirir. Hər gün daha yaxşı olmağımızı istəyir. Günbəgün bizi inkişaf etdirməyə çalışır.
XANOĞLAN İMANOV
