Semir Bukviç “Araz-Naxçıvan”la “İrəvan” arasında baş tutan oyunda buraxdığı ilk qolla yenə gülüş obyektinə çevrildi.
Hələ çempionatın əvvəlində - Premyer Liqanın 1-ci turunda “Araz-Naxçıvan” – “Turan Tovuz” qarşılaşmasında rəqib futbolçuların vurduğu zərbələrə reaksiya verə bilməyərək topu 3 dəfə tordan çıxaran bosniyalı qolkiper 4 aydır yaşıl meydan üzünə həsrət qalmışdı.
Baş məşqçi Azər Bağırov 32 yaşlı qapıçıya uzun fasilədən sonra şans verdi. Lakin bosniyalı legioner yenə ümidləri puça çıxardı.
Semir Sportinfo.az-a açıqlamasında ardıcıl səhvlərə maraqlı şərh verib:
“Futbolda səhvlər qaçılmazdır. Dünyanın ən məşhur futbolçuları da səhvlərə yol verir.
Az qala hər oyunda kiminsə səhvini görürük. 50 milyonluq Onanaya baxın, hər oyunda səhv edir (
“Mançester Yunayted”in “İnter”dən transfer etdiyi Andre Onana – H.). Mütəmadi oynamayanda bu cür nöqsanlar qaçılmazdır”.
Vaxtilə Bosniya və Hersoqovinanın U-21 millisinin şərəfini qorumuş Semir Bukviç vətənində “Olimpik”, “Jelezniçar”, “Travnik”, “Çelik”, “Mladost” kimi komandaların formasını geyinib, Polşada “Varta Poznan”da legioner həyatı yaşayıb.
HƏBİB
