Türkiyə millisinin sabiq baş məşqçisi Ştefan Kuntsun yeni iş yeri bəlli olub.
Almaniyalı mütəxəssis "Hamburq"un idman direktoru təyin edilib.
Bu barədə II Bundesliqa klubunun rəsmi saytı məlumat yayıb. Kunts daha əvvəl "Bohum"da da eyni vəzifəni icra edib.
O, Almaniyanın U-21 və Olimpiya yığmalarını da çalışdırıb. Ötən ilin sentyabrında Türkiyə millisindən istefaya göndərilən 61 yaşlı mütəxəssis AFFA-nın danışıqlar apardığı namizədlər sırasında idi.
Kunts "Hamburq"un dəvətini qəbul etməmişdən öncə menecerlər vasitəsilə federasiya ilə yenidən əlaqə yaradıb, Bakıya gəlməyə hazır olduğunu bildirib.
Buradan verilən cavab almaniyalının ürəyinə yağ kimi yaxılmayıb.
Nəzərinə çatdırılıb ki, qurumun rəhbərliyi onun millini çalışdırmasına artıq isti yanaşmır, yeganə namizəd kimi slovakiyalı Vladimir Vayssın üzərində dayanılıb.
SPORTİNFOAZ
