“Zirə”nin baş məşqçisi Rəşad Sadıqov Azərbaycan Premyer Liqasının 30-cu turu çərçivəsində “Neftçi”yə qarşı keçirdikləri oyunu şərh edib.

Sportinfo.az xəbər verir ki, o, 4:2 hesablı qələbəni belə şərh edib:

“Bizim üçün oyun olduqca çətin başladı. Rəqib önə keçdi. Oyunu davam etmək çətin idi. Lakin yenə də futbolçular özündə güc tapdı. Əsas budur. Dörd qol vurduq, vurmaya da bilərdik. Vacib 3 xal qazandıq. Növbəti oyunlara baxmalıyıq. “Sumqayıt”la önəmli oyunumuz var. Bu oyunu unudub gələcək oyunlara köklənməliyik.

Məşqçiliyə başladıqdan sonra mediadan, sosial mediadan uzaqlaşmışam. Heç bir mənfi, müsbət fikirlərdən xəbərdar deyiləm. Biz işimizi təriflənmək üçün qurmuruq. Təriflənməli olsaq, tərifləyərlər. Bəli, 6 xal üstünlüyümüz var, lakin düşünmürəm ki, biz nəyisə bacarmışıq. Hələ irəlidə çox önəmli oyunlarımız var. Mən artıq “Sumqayıt”la oyunu fikirləşəcəm və bunun üstündə düşünəcəm. Məni yalnız bu düşündürür. Başqa heç nə.

Mən futbolçu olaraq da heç vaxt özümdən razı olmamışam. Daha yaxşısını istəmişəm. Hər zaman daha yaxşısını fikirləşirəm. Bu gün də fikirləşəcəm ki, rəqib oyuna nəyə görə yaxşı başladı, biz harda səhv etdik, nəyə görə iki qol buraxdıq. “Yaxşı etdim, bu, kifayət etdi deməyəcəm” heç vaxt. Bunu düşündüyüm gün geriyə addımlayacam.

İlk 15 dəqiqə rəqibin pressinqinin təsirində qaldıq. Hesab 0:2 olduqdan sonra da inanmıram ki, yaxşı oynadıq. Daha sonra hücumu yaxşılaşdırmağa çalışdıq. Bizim üstünlüyümüz bu oyunda ehtiyat qüvvəmizin “Neftçi”nin ehtiyat qüvvəsindən üstün olmağı idi. İkinci hissədə daha riskli oynayırdıq. 2:2 olduqdan sonra 3-cü, 4-cü qollar əks-hücumun nəticəsi idi. Ola bilər ki, gələn oyunda “Neftçi” üstün olsun. Biz bu gün sadəcə, uğurlu olduq”.