“Qarabağ”ın yeni transferi Taofik İsmahil Sportinfo.az-a müsahibə verib.

26 yaşlı nigeriyalı vinger özü və komandası ilə bağlı sualları cavablandırıb.

- Yeni ölkə, yeni klub. Özünü necə hiss edirsən?

- Hər şey qaydasındadır. Zamanla mövcud vəziyyətə uyğunlaşıram. Klubda çalışanlar, komanda yoldaşlarım, məşqçilər – hamı mənə kömək edir. Artıq iki oyuna da çıxmışam. Bu gün xoşbəxt olduğumu deyə bilərəm.

- Sanki komanda yoldaşlarınla anlaşma çətinliyi yaşayırsan.

- Bu, normal haldır. Bir-birimizin oyun üslubunu bilmək üçün bir neçə ay birlikdə çıxış etməliyik. Vaxt keçdikcə yaxşı olacağına əminəm. Çünki nəyə qadir olduğumu bilirəm.

- Meydanda üstün tərəflərin nələrdir?

- Sürət, driblinq, assist, qol, boş mövqe tapmaq – zamanla görəcəksiniz (gülür). İlk oyunumda “Sumqayıt”a qol vurmuşdum, ofsayda görə qeydə alınmamışdı. “Araz-Naxçıvan”la qarşılaşmada isə ilk qolun ötürməsini verdim.

- Azarkeşlər əsl Taofiki görmək üçün nə qədər gözləsinlər?

- Dəqiq tarix demək mümkün deyil, Onu deyə bilərəm ki, məşqlərdə var gücümlə çalışıram. Özüm də “Qarabağ”da ilk qolu vurmaq üçün səbrsizlənirəm.

- Yarımmüdafiənin solu sənə tanış mövqedir, yoxsa?

- Mənim üçün harada oynamağın fərqi yoxdur. İstənilən yerdə çıxış edə bilirəm – yarımmüdafiənin sağı-solu, mərkəzi, hətta hücumçu kimi. Əsas odur baş məşqçi şans versin.

- “Qarabağ” mövsümə 3 qələbə ilə başlasa da, müdafiə xətti etibarlı görünmür. Rəqiblər qapınızdan 3 top keçirməyə nail olub. Bunun səbəbini nədə görürsən?

- Yenilənmiş komandayıq. Bildiyimə görə, yayda komandaya 10 yeni futbolçu cəlb olunub (əslində, say 11-dir – H.). Belə olduğu halda anlaşılmazlıqların yaşanması normaldır. Baş məşqçi çatışmazlıqların aradan qaldırılması üçün lazım olan tapşırıqları verir. Biz də çalışırıq nöqsanları aradan qaldıraq. Daha yaxşı olmaq üçün inkişaf etməliyik.

HƏBİB