Zədələnən futbolçunun 2 ildən sonra yaşıl meydanlara qayıtması əsl qəhrəmanlıqdır.

Bu, hər futbolçunun bacara biləcəyi iş deyil. Denis Marandiçi bunun öhdəsindən gəldi.

2024-cü ilin noyabrın 24-də “Turan Tovuz” – “Sabah” matçının gedişində rəqib hücumçu Pavol Şafranko ilə mübarizədə ayağı sınan moldovalı müdafiəçi 648 gün, başqa cür desək, 1 il 10 aydan sonra bölgə təmsilçisinin heyətində meydana ayaq basdı.

Futbol həsrətinə son qoyan Marandiçi sosial şəbəkə hesabında paylaşım edərək bu müddətdə keçirdiyi hisləri ifadə edib, lazım olan şəxslərə minnətdarlığını bildirib:

“1 il, 9 ay və 10 gün.
3 əməliyyat.
Fitnes zallarında və fizioterapiya klinikalarında yüzlərlə saat.
Saysız-hesabsız ağrı, şübhə, məyusluq və ağır zəhmət anları.

Nəhayət… evə qayıtdım!

Bu an mənim üçün sözlə ifadə edə biləcəyimdən daha çox məna daşıyır.

Elə anlar oldu ki, bu prosesin doğru olub-olmadığını düşündüm. Yol bitmək bilmirdi və yolun sonundakı işıq çox uzaqda görünürdü. Amma həyatda sınmış ayaqdan daha böyük çətinliklər var…

Bu, mənim kim olduğumu müəyyən etmir. Mən çox şeydən, çox böyük fədakarlıqlardan keçmişəm və buna görə də asanlıqla təslim olmayacağam. Bu, sadəcə, öhdəsindən gəlməli olduğum və yenidən aid olduğum yerə qayıtmalı olduğum başqa bir sınaqdır.

Klubumdakı hər kəsə təşəkkür etmək istəyirəm — prezidentə, rəhbərliyə, məşqçilər heyətinə, tibbi komandaya, komanda yoldaşlarıma və bütün azarkeşlərimizə.

Bu çətin bərpa dövründə mənə göstərdiyiniz inanılmaz dəstəyə, gücə və inama görə təşəkkür edirəm. Dəstəyiniz heç vaxt diqqətimdən yayınmadı və mübarizəni davam etdirmək üçün mənə daha da böyük motivasiya verdi.

Fizioterapevtlərə, məşqçilərə və bu prosesdə yanında olan digər insanlara təşəkkür davam edir.

Bərpa prosesimdə iştirak edən hər bir həkimə, bütün fizioterapevtlərimə, məşqçilərimə və bu uzun yol boyunca mənə kömək edən hər kəsə xüsusi təşəkkürümü bildirirəm. Gördüyünüz işə, səbrinizə və fədakarlığınıza görə sizə həqiqətən minnətdaram.

Və hər şeydən əvvəl, ailəmə, dostlarıma və mənim qayğıma qalan, ən çətin anlarımda yanımda olan hər kəsə təşəkkür edirəm. Siz həmişə məni yoluma davam etməyə, inanmağa və heç vaxt təslim olmamağa sövq etdiniz.

Həmçinin yuxarıdan mənə nəzarət edən, bu yol boyunca yanımda olduğunu bildiyim çox xüsusi bir insana…

Bu, uzun bir yol oldu. Amma hər uğursuzluq, hər ağrılı gün və çəkilən hər zəhmət bu an üçün buna dəyərdi.

Mən geri qayıtdım.

Və əvvəlki kimi eyni əzmkarlıq və motivasiya ilə, üstəlik futbola əvvəlkindən də böyük həvəslə geri qayıtmışam!”

HƏBİB / SPORTİNFO.AZ