Azərbaycan yığmasının müdafiəçisi Bəxtiyar Həsənəlizadə «Tuzlaspor»dan şikayətçi düşüb.
Ötən mövsümü Türkiyədə keçirən arxa xətt oyunçusu yerli futbol federasiyasına (TFF) müraciət edib.
«Şamaxı», «Kəpəz», «Səbail» və «Araz-Naxçıvan»dan dəvət alan «Sumqayıt»ın yetirməsi sonuncuları seçsə də, hələ rəsmi müqavilə imzalaya bilməyib.
Həsənəlizadənin «Tuzlaspor»la sözləşməsi 2 illikdir. İyulun 1-də birillik dönəm arxada qalacaq. Onu narazı salan TFF I Liqa komandasının üzərinə götürdüyü maliyyə öhdəliklərini yerinə yetirməməsidir.
Sezonun yekununa əsasən, çempionatda yerini qoruya bilməyən və II Liqaya yuvarlanan tuzlalıların Bəxtiyarın bir neçə aylıq əməkhaqqı borcu qalıb.
O, TFF-nın qapısını döyərək həm borcunun ödənilməsini, həm də müqaviləsinə xitam verilməsini istəyib.
SPORTİNFO.AZ
