Sentyabrda “Neftçi”dən ayrılan Qara Qarayevin “Araz-Naxçıvan”a keçməsini dünən xəbər vermişdik.
Yarımmüdafiəçi artıq komandanın düşərgəsindədir.
Bu anlaşmayla bağlı bəzi təfərrüatlar üzə çıxıb. Klubdan redaksiyamıza daxil olan informasiyaya görə, millinin sabiq üzvünün gəlişi Zaur Axundovla bağlıdır.
Belə ki, Naxçıvan Futbol Federasiyasının prezidenti onunla şəxsən görüşüb və təklifə razı salıb. Qarayev hörmətli şəxsin dəvətini geri çevirməyib və əvvəlki klubunda qazandığı puldan xeyli aşağı məbləğə «okey» verib.
O, 2008-2023-cü illərdə “Qarabağ”da çıxış edib. 2023-cü ildə “Neftçi” ilə müqavilə imzalasa da, cəmi 1 il sonra paytaxt klubundan ayrılıb.
Baş məşqçi Roman Qriqorçukla yaşadığı problemlərdən sonra düşərgəni tərk etmək qərarına gəlmişdi. Halbuki kontraktı gələn ilin yayında bitəcəkdi.
Qarayev bir neçə aylıq maaş mislində təzminat almaq şərtiylə sözləşməsinə qarşılıqlı razılaşma əsasında xitam verib.
SPORTİNFO.AZ
