“Turan Tovuz” dördüncü dövrənin ilk görüşünü 1 xalla başa vurdu.
Ev komandası kimi tanınan bölgə təmsilçisi Bakıda “Səbail”lə oyunda rəqibin müqavimətini qıra bilmədi – 1:1.
Toqolu müdafiəçi Emanuel Hakman Sportinfo.az-a müsahibə verərək komandası ilə bağlı sualları cavablandırıb.
- Sentaybrın 1-dən səfərdə qələbə qazana bilmirsiniz. Bu da 10-cu belə oyun oldu.
- “Səbail” yaxşı təşkilatlanmış komandadır. Buna baxmayaraq, rəqibdən geri qaldığımızı düşünmürəm. Gördüyünüz kimi, çox sayda qol imkanları yaratdıq, lakin sonluq çatmadı. Ruhdan düşmürük, qarşıda bizi daha vacib matçlar gözləyir. Onlara hazırlaşacağıq.
- Sanki 1 xal ürəyinizcə oldu.
- Yox-yox. Bura qələbə dalınca gəlmişdik. Bəlkə kənardan dediyiniz kimi görünüb. Məqsədimiz və düşüncəmiz 3 xal əldə etmək idi.
- Bu gedişlə xoşbəxtlərin arasında yer almaq mümkün olacaq?
- İdmançıda ən vacib amil öz gücünə inanmasıdır. Mən və komanda yoldaşlarım özümüzə güvənirik. Mümkünsüz heç nə yoxdur. Oyun planında yaxşı görünürük, motivasiyamız yüksəkdir. Daha çox çalışmaqla avrokuboklara vəsiqə qazana bilərik.
- Bunun üçün nə baş verməlidir?
- Qələbələr qazanmalıyıq. Növbəti 8 oyunda qalib gəlməyi bacarmalıyıq. Bunu edəcəyimizə inanıram.
- İtirilən 2 xal “Sabah”la qarşılaşma öncəsi əhvalınıza mənfi mənada təsir etməyəcək ki?
- Faciə yaşanmayıb. Yaxşı futbol oynayıb, çox sayda qol epizodları yaradıb 1 xal qazandıq. Hər şey qaydasındadır.
HƏBİB