Premyer Liqada növbəti baş məşqçi istefası «Araz-Naxçıvan»ın payına düşdü.
Azər Bağırov üçüncü mövsümündə Muxtar Respublika klubunu tərk etməli oldu.
Bu, gözlənilirdi, sadəcə, geci-tezi var idi, o da dünənə təsadüf elədi.
Ayrılığı şərtləndirən səbəblər çoxdur. Sadalamaqla qurtarmaz. Problemlər üst-üstə yığıldı və bütün bunlar günlərin birində partlaq verməli idi.
Bağırovun gedişindən «Araz-Naxçıvan» qazanmadı. Çox şey itirdilər. O, mövsümə yaxşı başlamışdı.
Əsl fırtına! Komandanı uzun müddət liderlər qrupundə saxlayan baş məşqçini qorumaq lazım idi, təəssüf ki, rəsmilər bunu etmədi və ya etmək istəmədi.
Bəlkə də Bağırov vaxtında onlarla münasibətlərini qoruyub «körpülər»i yandırmasaydı, sonluq belə alınmayacaqdı. Bu gənc oğlan futbolçuların tərəfini tutdu, onların üstündə başbilənlərlə üz-göz oldu, az qala dalaşdı.
Kollektivə daxil fərdlər isə onu qorumadı, qədrini bilmədi. Onlara görə rəhbərliyə dirənən, maaşlarının, mükafatlarının arıtılmasını tələb edən baş məşqçini əllərinin içində saxlamalı, qorumalı idilər, əksini etdilər.
Oynamadılar. Ayaq sürüdülər. Özlərinə pislik elədilər. Bunun cəzasını çəkəcəklər.
Tanrı yaxşının dəyərini bilməyənlərin əfv fərmanına heç vaxt qol çəkməz.
ELNUR
