Çempionlar Liqasındakı qürur yerimiz “Qarabağ” bu gün növbəti oyuna çıxacaq.

“Köhlıən atlar”ın Liqa mərhələsinin VI turundakı rəqibi dünya şöhrətli “Ayaks”dır.

Niderland təmsilçisinin Avropa arenalarında qazandığı titullar göz qamaşdırır. “Qırmızı-ağlar” 4 dəfə Çempionlar Liqasının, hərəsində 2 dəfə olmaqla İntertoto kubokunun və Superkubokun, hərəsində 1 dəfə olmaqla UEFA kubokunun (indiki adı Avropa Liqası - H) və Kuboklar Kubokunun qalibi adını qazanıb.

Muzeyində 10 kubok “bəsləyən” “Ayaks”ın hazırkı vəziyyəti heç də ürəkaçan deyil.

Buna əmin olmaq üçün ötən mövsüm Avropa Liqasının 1/8 final mərhələsinə qədər irəliləyən “şəhərlilər”in nəticələrinə baxmaq kifayət edir.

* ”Ayaks” Liqa mərhələsində keçirdiyi 5 oyunun hamısını məğlub başa vurub.

* “Ayaks” 5 matçda rəqib qapılarına cəmi 1 dəfə yol tapmaqla öz qapısından 16 top buraxıb.

* ”Ayaks” avrokuboklarda son 3 səfər qarşılaşmasında darmadağın olub – 1:4, 0:4, 1:5.

* “Ayaks” avrokuboklarda son 6 səfər matçında cəmi 1 qələbə qazanıb.

* “Ayaks” avrokuboklarda sonuncu qələbəsini bu ilin fevralın 14-nə bayram edib.

* “Ayaks” avrokuboklarda ardıcıl 7 görüşdə məğlub olub.

Rəqəmlərdən də göründüyü kimi, vaxtilə adı ilə rəqiblərin canına qorxu salan Niderland nəhəngi hazırda tarixinin ən çətin günlərini yaşayır.

Xüsusən cari mövsümdəki nəticələri “Qarabağ”ın əl-qolunu açmalı, qələbə müjdəsi verməlidir.

Ümid edək ki, rəqibin uğursuz seriyası bu axşam Bakıda davam edəcək.

Tofiq Bəhramov adına Respublika stadionunda gerçəkləşəcək duelin start fiti saat 21:45-də çalınacaq.

HƏBİB / SPORTİNFO.AZ