.jpg)
"Zirə"nin hücumçusu Xulio Sezar Rodriqes Azərbaycan Premyer Liqasında 3-cü dəfə dubla imza atıb.
Sportinfo.az "Zirə"nin Mətbuat Xidmətinə istinadən xəbər verir ki, paraqvaylı futbolçu XII turda “Keşlə”nin qapısından 2 top keçirib.
Rodriqes ilk iki dubluna ötən mövsüm səfər görüşlərində nail olub. Onun iki qol vurduğu ilk komanda da “Keşlə” olub və "Zirə" həmin matçda 3:1 hesabı ilə qalib gəlib. Bu görüşdən 6 gün sonra – mayın 11-də “Sabah”la rəqib meydanındakı qarşılaşmada da iki top vuran forvard 3:0 hesablı qələbədə rol oynayıb.
Cari mövsümdə ilk dublunu gerçəkləşdirən Xulio ümumilikdə 3-cü dəfə buna nail olmaqla salvadorlu hücumçu Nelson Bonilyanın rekordunu təkrarlayıb. Paraqvaylının dublları eyni ilə, lakin fərqli mövsümlərə təsadüf edibsə, Bonilya eyni mövsüm, amma fərqli illərdə bunu gerçəkləşdirib.
O, 2015/16 mövsümündə “Kəpəz” və “Rəvan”a ev, “Qəbələ”yə səfərdə 2 qol vurub. İlk görüş 2015, digərləri 2016-da baş tutub.
Qeyd edək ki, bu, “Zirə”nin futbolçularının Premyer Liqada 16-cı dublu olub. Hərəyə üç dəfə fərqlənən Bonilya və Rodrigesdən başqa daha bir oyunçu bir dəfədən artıq dubl müəllifidir. Bu, iki belə uğuru olan Təmkin Xəlilzadədir.
.jpg)
