“Zirə” Azərbaycan Premyer Liqasında 50-ci qələbəsini qazanıb.

Sportinfo.az xəbər verir ki, yubiley 12-ci turun “Keşlə” ilə (3:1) matçına təsadüf edib.

3:1 hesabı ilə qalib gələn “qartallar” 2015-ci ildə debüt etdikləri Premyer Liqada 50-ci dəfə üç xala sevinib. Bu, komandanın 132-ci görüşündə qeydə alınıb. Qələbələrdən 31-i ev, 19-u səfərdə əldə olunub.

“Keşlə” ilə matç baş məşqçi Zaur Həşimovun rəhbərliyi altında əldə olunan ilk qələbə kimi də tarixə düşüb. O, komandanın “sükanı arxası”nda qələbə sevinci yaşayan 4-cü mütəxəssisdir. Onadək Adil Şükürov 21, Ayxan Abbasov 18, Samir Abasov 10 dəfə “Zirə”nin qələbəsində pay sahibi olub.

Cari mövsüm 3-cü dəfə 3 xala sevinən qəsəbə klubu əvvəlki 4 turnirdə 47 dəfə rəqiblərini məğlub edib: 2015/16 – 17, 2016/17 – 10, 2017/18 – 12, 2018/19 – 8. Yeri gəlmişkən, “Zirə” “Keşlə”ni 5-ci dəfə məğlub edib.

Premyer Liqada qarşılaşdığı 11 komandadan 10-na qalib gələn Həşimovun komandası yalnız “Qarabağ”dan üç xal almayıb: “Sumqayıt” – 10, “Neftçi” – 9, “Kəpəz”, AZAL, “Keşlə” – 5, “Qəbələ”, “Səbail”, “Xəzər Lənkəran” – 4, “Rəvan” – 3, “Sabah” – 1.

“Zirə”nin əlamətdar qələbələrinin hamısı ev oyunlarında əldə olunub:
1-ci. 09.08.2015. Zirə - AZAL - 1:0
10-cu. 15.02.2016. Zirə - Rəvan - 2:1
20-ci. 16.10.2016. Zirə - Neftçi - 2:0
30-cu. 26.08.2017. Zirə - Sumqayıt - 3:1
40-cı. 05.10.2018. Zirə - Qəbələ - 1:0
50-ci. 24.11.2019. Zirə - Keşlə - 3:1