“Sumqayıt”ın bu qış yollarını ayıracağı futbolçuların siyahısına yeni ad əlavə olunub.
“Kimyaçılar” yayda sıralarına qatdığı Almir Aqanspahiçlə vidalaşacaq.
“Gənclik şəhəri” təmsilçisi ötən mövsümü “Çukariçki”də keçirmiş bosniyalı hücumçunu 1 illik icarəyə götürüb.
Samir Abasov əsas heyətə düşməyən balkanlı forvardla anlaşmaya vaxtından əvvəl xitam vermək istədiyini rəhbərliklə görüşdə qeyd edib. Adı “qara siyahı”ya düşən Almirlə müqavilə ikitərəfli qaydada ləğv olunacaq.
“9” nömrəli formanı geyinən 25 yaşlı legioner karyerası ərzində Bosniya və Herseqovinanın “Sarayevo”, “Mladost” (Kakan), “Krupa”, “Çelik”, Xorvatiyanın “Osiyek”, Norveçin “Raufoss”, Serbiyanın “Novi Pazar” və “Çukariçki” klublarının uğurları üçün çalışıb.
Bosniya və Herseqovinanın U-17, U-18 və U-21 millilərinə də cəlb olunub.
SPORTİNFO.AZ
