Azərbaycanın avrokuboklarda mübarizəni davam etdirən yeganə təmsilçisi “Qarabağ” növbəti matçını keçirib.

Sportinfo.az xəbər verir ki, Avropanın üçüncü dərəcəli klub turniri olan Konfrans Liqasında mübarizə aparan Qurban Qurbanovun yetirmələri qrup mərhələsində son ev oyununda qüvvəsini sınayıb.

İlk iki yerdən birini təmin edən Ağdam təmsilçisi Tofiq Bəhramov adına Respublika stadionunda “Omoniya” ilə görüşüb. Səfərdəki oyunda olduğu kimi yenə hesabı ilk yarıda kiprlilər açıb.

Bütün görüş boyu üstünlüyə malik olan “Qarabağ” fasilədən sonra hesaba tarazlıq gətirib. Künc zərbəsindən sonra kiprlilər avtoqola üzülüblər. Az sonra qırmızı vərəqə alan qonaqlar azlıqda qalıblar.

“Qarabağ” bu say üstünlüyündən yararlana bilməyib. Düzdür, Patrik Andradenin qolundan sonra təmsilçimiz hesabda önə keçib.

Lakin kiprlilər irəli çıxan Şahrudin Məhəmmədəliyevin bu kobud səhvindən sonra uzaqdan zərbə ilə hesabda tarazlıq yaradıb – 2:2.

Evdə xal itirən komandamız “Bazel”ə çatsa da, əlavə göstəricilərə görə ikinci pillədə qalıb. Pley-offa deyil, birbaşa 1/8 finala vəsiqə qazanmaq üçün ağdamlılar əsas rəqibini səfərdə məğlub etməlidir.

"Qarabağ” dekabrın 9-da keçiriləcək VI turda İsveçrədə “Bazel”in qonağı olacaq.

25 noyabr
“Qarabağ” (Azərbaycan) – “Omoniya” (Kipr) - 2:2
Qollar: Paris Psaltis, 49 (öz qapısına), Patrik Andrade, 88 - Mihal Duriş, 43 (p.), Jordi Qomez, 90
Qırmızı vərəqə: Kiko, 66
Baş hakim: Morten Krox (Danimarka)
“Qarabağ”: 1. Şahrudin Məhəmmədəliyev, 2. Qara Qarayev, 5. Maksim Medvedev (k), 6. Patrik Andrade, 10. Abdullah Zubir, 19. Filip Ozobiç, 20. Kadi Borqes, 25. İbrahima Vadji, 27. Toral Bayramov, 30. Abbas Hüseynov, 81. Kevin Medina
Ehtiyat oyunçular: 12. Emil Balayev, 89. Amin Ramazanov, 4. Rahil Mammadov, 7. Riçard Almeyda, 13. Bəhlul Mustafazadə, 18. İsmayıl İbrahimli, 22. Musa Qurbanlı, 24. Zamiq Əliyev, 29. Marko Veşoviç, 44. Elvin Cəfərquliyev, 77. Ramil Şeydayev, 83. Nihad Quliyev
Baş məşqçi: Qurban Qurbanov

“Omoniya”: 23. Fransis Uzoho, 2. Paris Psaltis, 5. Kiko, 11. Erik Bautheac, 18. Mihal Duriş, 20. Panagiotis Zahariou, 22. Adam Lanq (k), 30. Nikolas Panagiotou, 76. Xaralampos Xaralampous, 80. Andonikos Kakoulli, 83. Andreas Asimenos
Ehtiyat oyunçular: 74. Kasper Xorazka, 4. Abdullahi Şehu, 8. İyayi Atiemven, 13. Fotis Papoulis, 15. Tomaş Huboçan, 16. Jordi Qomez, 17. Yan Leçyaks, 21. Marinos Tzionis, 42. Mikkel Diskerud, 44. Marko Şkepoviç, 75. Loizos Loizou, 82. Andreas Evangelou
Baş məşqçi: Henninq Berq
Tofiq Bəhramov adına Respublika stadionu