"Tottenhem" Premyer Liqanın XVII turunun "Çelsi" ilə oyununda (0:2) rəqib komandanın müdafiəçisi Antonio Rudigerə qarşı irqçilik edən yerli azarkeşlərlə bağlı bəyanat yayıb.
Sportinfo.az xəbər verir ki, bu cür halları pisləyən London klubu həmin hərəkətə yol verənlərin ən sərt şəkildə cəzalanacağını bildirib:
"Hər bir azarkeşi kameraların köməkliyi ilə izləyə bilirik. Videomüşahidə üçün xeyli vaxt sərf etdik. Məsələni aydınlaşdırmaq üçün insanların dodaq hərəkətlərinə fikir verdik və əlavə məlumatlar üçün "Çelsi" nümayəndələri ilə əlaqə saxladıq. Matçda iştirak edən digər tərəflərin açıqlamalarını da götürdük. Polislər araşdırma zamanı bizə kömək edəcəklər. Əmin olun ki, biz məsələni dəqqətlə araşdıracağıq.
Klubumuz bütün yarışlarda irqçiliklə mübarizə təcrübəsi ilə fəxr edir. Günahı təsdiqlənən istənilən fanata ömürlük qadağa qoyulacaq. İndiki məqamda isə araşdırmamız hələ başa çatmayıb".
Qeyd edək ki, sözügedən matçda bəzi "Tottenhem" azarkeşləri Rudiger haqda irqçi şüarlar səsləndiriblər.