Premyer Liqamızda üç klubun formasını geyinmiş Yevgeni Koçukun Azərbaycan dövlətinə borcu var imiş.
Sportinfo.az xəbər verir ki, moldovalı legioner vergidən yayınmaqda ittiham olunur.
Yarımmüdafiəçinin vergi orqanlarına 7729 manat borcu olduğu üzə çıxıb. Borcunu ödəmədiyi üçün o, İqtisadiyyat Nazirliyi Yanında Dövlət Vergi Xidməti Bakı Şəhər Lokal Gəlirlər Baş idarəsi tərəfindən məhkəməyə verilib.
Hazırda onun işi Bakı Kommersiya Məhkəməsində icraata götürülüb. Onun işinə baxılması hakim Zeynəb Axundovaya tapşırılıb.
Koçuk "Səbail"ə 2018-ci ilin yanvarında Slovakiya klubu "Jilina"dan gəlib. Həmin ilin yay fasiləsində sabiq komandasına qayıdan orta sahə oyunçusu qısa müddət sonra yenidən "Səbail"lə müqavilə imzalayıb.
2020-ci ildə "Sabah"a transfer olunub, 2021-ci ildə "Keşlə"yə (indiki "Şamaxı") keçib. O, 2022-ci ilin yanvarından düşmən ölkə olan Ermənistan təmsilçisi "Pünik"in formasını geyinir.
Yevgeni 2 ay öncə ölkəsinin yığmasının heyətində millimizlə Kişinyov şəhərində keçirilən yoxlama görüşündə meydana çıxıb.
Moldovalı Azərbaycanda ən çox pulu "Səbail"də qazanıb. Ayına 9000-12000 dollar civarında. "Şamaxı"da isə aylıq cəmi 5000 dollar qarşılığında meydana çıxıb.
