.jpg)
«Zirə» ilə qarşılaşma Tərlan Əhmədovun «Keşlə»də son oyunu ola bilər.
Sportinfo.az-ın klubdan əldə etdiyi məlumata görə, Müşahidə Şurasının sədri Zaur Axundov yeni baş məşqçi axtarışına başlayıb.
Komandanın Premyer Liqanın son 2 turunda «Səbail» və «Neftçi»yə məğlubiyyəti onda Əhmədova qarşı ciddi inamsızlıq yaradıb. Hazırkı çalışdırıcının məşqçiyə yaraşmayan hərəkətləri, futbolçularla tez-tez mübahisə etməsi, üstəlik, 2 köməkçisinin danışılmış oyunların üstündə futboldan qovulması MŞ sədrini sarsıdıb. Elə bu səbəbdən dəyişikliyə lüzum görür.
Əgər «Keşlə» bu tur «Zirə»yə uduzsa, gümüş medal şansını böyük ölçüdə itirəcək. Çünki «Neftçi» ilə aradakı xal fərqi artıq 4-dür. «Ağ-qaralar»ın Qəbələ səfərindən qələbəylə dönmək ehtimalı yüksək olduğundan, «Zirə»ni üstələmək «Keşlə» üçün çox vacibdir.
Ötən 2 uğursuz oyuna görə komandanın üstünə getməyən Axundov məhz bu qarşılaşmanın nəticəsini gözləyir.
Baş məşqçi vəzifəsinə namizədi varmı? Var! Özü də iki nəfər.
Biri mövsümün əvvəlində «Zirə»dən uzaqlaşdırılan Samir Abasov, digəri isə hazırda «Neftçi-2»ni çalışdıran Mahmud Qurbanovdur. Namizədlərdən Abasovu AFFA birbaşa dəstəkləyir. Onun adı xeyli müddətdir Axundovun masasının üzərindədir.
SPORTİNFO.AZ
.jpg)
