Ötən ilin iyulunda “Sumqayıt“ın sükanı arxasına keçən Saşa İliçin burada fəaliyyətini davam etdirib-etdirməməsi qazanacağı nəticələrdən asılıdır.

Klub rəhbərliyi artıq ona müvafiq xəbərdarlığını edib.

Serbiyalı mütəxəssis komandanı avrokuboklara daşımalıdır ki, onunla yeni müqavilə imzalansın. Bunun üçün iki yol var – Premyer Liqa və ölkə kuboku.

Hələlik “kimyaçılar“ın hər iki “cəbhə“ vasitəsilə qitə arenasına çıxmaq şansı qalmaqdadır.

“Gənclik şəhəri“ təmsilçisi kubokun ¼ final mərhələsində “Zirə“nin rəqibidir. Premyer Liqada 22 tura 31 xal toplamış komanda hazırda turnir cədvəlinin altıncı pilləsindədir.

“Sumqayıt“ balkanlı çalışdırıcı ilə 1 illik müqavilə imzalayıb. Şər deməsən, xeyir gəlməz - qarşıya qoyulan hədəfə çatmaq mümkün olmasa, o, iyunda geri dönməmək şərtiylə ölkəsinə qayıtmaq məcburiyyətində qalacaq.

İliçin baş məşqçi kimi ilk iş yeri “Çukariçki” olub. 2021/22 mövsümünün əvvəlində komandanın başına gətirilib, apreldə qovulub.

Növbəti mövsümün əvvəlində - 2022-nin iyununda Sofiya ÇSKA-sının sükanı arxasına keçən mütəxəssisin ən uzunmüddətli iş yeri elə buradır.

2023-ün iyulunda Bolqarıstan klubundan da ayrılıb. Amma işsiz günləri o qədər də uzun sürməyib. 2023-ün oktyabrından Yunanıstanda - “Atromitos”da işləməyə başlayıb.

“Atromitos” mövsümü 8-ci yerdə bitirib və İliç ötən ilin mayında Yunanıstandan ayrılıb. Amma cəmi iki gün sonra Rusiyada görünüb.

Nijni-Novqorod təmsilçisi “Pari” ilə müqavilə bağlayıb. “Pari” sezonun sonunda 13-cü yeri tutub, pley-offda isə “Soçi”yə uduzmaqla premyerliqada yerini itirib.

Ancaq soydaşımız Tufan Sadıxovun sahibi olduğu “Ximki” elitadan qovulduğundan, “Pari” çempionatda qalıb. Bununla belə, klub rəhbərliyi onunla yoluna davam etməyib.

SPORTİNFO.AZ