“Medalçılar sırasında olmaq real görünsə də, mübarizə çempionatın sonuna qədər davam edəcək”.
Bu sözləri Sportinfo.az-a açıqlamasında “Sumqayıt”ın hücumçusu Nikola Ninkoviç deyib.
Premyer Liqada qış fasiləsi elan olunub. 16 tura 27 xal toplayan «kimyaçılar» turnir cədvəlinin 5-ci pilləsində qərarlaşıb.
«Turan»la eyni xala malik «gənclik şəhəri» təmsilçisi üçüncü sıradakı «Zirə»dən cəmi 1 xal geri qalır.
Serbiyalı legioner hesab edir ki, «Sumqayıt» avrokuboklar uğrunda yarışmaq gücündədir:
«Bundan sonra hələ 17 tur qalır. Bu, kifayət qədər uzun zaman deməkdir.
Yanvardan sonrakı dörd ay ərzində gərgin mübarizə gedəcək. Yaxşı komandamız var.
İstədiyimiz nəticələri qazansaq, onsuz da, yuxarıda olacağıq.
İndidən heç kim deyə bilməz ki, hansı komanda mövsümün sonunda hansı yeri tutacaq. Çempionatda böyük rəqabət görürəm».
