"Sumqayıt"ın yay fasiləsində heyətə qatdığı simalardan biri də sabiq oyunçusu Höccət Haqverdi oldu.
32 yaşlı müdafiəçinin ölkəmizdə ilk klubu məhz "Kimyaçılar" olub.
O, burada özünü yaxşı tərəfdən göstərərək hətta ölkənin bir nömrəli komandasına dəvət almağı bacarmışdı.
Amma son dönəmlər klub karyerasında işlərini yolunda getməyən stoper millidən də uzaq düşüb.
Düzdü, bu sezon da onun üçün uğurlu başlayıb demək olmaz.
Bir qədər gec qoşulduğu "Sumqayıt"da hələ əsas heyət üzvü sayılmır.
Lakin 12-ci turda "Qarabağ"a qarşı 90 dəqiqə meydanda olan arxa xəttə oyunçusu kifayət qədər etibarlı oyunu ilə seçildi.
Hətta bərabərlik qolunu aktivinə yazdırmağı da bacardı.
Elə oyundan sonra Sportinfo.az-a açıqlama verən Höccət milli komandaya yenidən qayıtmaq şanslarını dəyərləndirib:
"Həmişə demişəm ki, lazım olanda milli komandaya kömək etməyə hazıram.
Baş məşqçinin kim olmasının fərqi yoxdur.
Ayxan məni yaxşı tanıyır və birlikdə işləmişik. Hələ dəvət almamışam və bu, baş məşqçinin fikri idi.
Heç kimlə danışmamışam, amma təbii ki, dəvət aldığım zaman kömək etməyə hazıram".
XANOĞLAN
