İlyarımdan çoxdur ki, Sumqayıtda yeni stadion tikilib.

Köhnə «Mehdi Hüseynzadə»nin yerində gül kimi arena inşa olunub.

Tutumu 10 minə yaxındır. Gəl ki, bu gözəl məkan dolmur.

Bir tək «Qarabağ»ın avtobusu Sumqayıta yan alanda «Mehdi Hüseynzadə»də anşlaq yaranır. Başqa kim gəlir gəlsin, tribunaların əksəriyyəti boş qalır.

Belə etinasızlıq və biganəlik olmaz. Şəhərin tək komandasına bu cür saymazyana münasibət sərgiləyənlər utansınlar!

«Sumqayıt» mövsümə əla start verib. «Kəpəz»i evdə, «Qarabağ»ı səfərdə udublar.

Gözləmək olardı ki, uğurlu başlanğıc futbol şəhəri sayılan Sumqayıtın yatmış azarkeş ordusunu qəfil çağırışla yerindən tərpədəcək,

«Şamaxı» ilə qarşılaşmada qələbəlik yaradacaqlar. Olmadı bu dəfə də. O boyda stadiona vur-tut 2000 nəfər təşrif buyurdu, tribunalar çılpaq qaldı.

«Sumqayıt» keçənilkindən güclüdür. Bu yay etdiklərini transferlər bəyənilsin! Müdafiə və yarımmüdafiənin cinahları işləkdir.

Yarımmüdafiə və hücumun mərkəzi də o cümlədən. Səbəbini bilmək maraqlı olardı ki, niyə Aleksa Yankoviç bu qarşılaşmaya əsas heyətdə başlamadı.

Serbiyalı orta sahə oyunçusu ikinci hissənin gedişində oyuna qoşulunca, «Sumqayıt» büsbütün dəyişdi, qonaqların qapısına tərəf daha çox getdi, qol da vurdular.

Saşa İliçin başını ağrıtsa, müdafiə xətti ağrıdacaq. Birinci zonanın mərkəzində boşluqlara çox yol verilir.

Pedro Pinto etibarlı təsir bağışlamır. Serbiyalı baş məşqçi portuqaliyalının mövqeyinə başqasını tapmalıdır ki, ürəyi ağzına gəlməsin.

KAMİL