Gəncənin sabiq icra başçısı Elmar Vəliyevin qardaşına məxsus ASC-nin 270 min dollarlıq alacağı var. ASC borcu məhkəmə səviyyəsində həll etmək istəsə də sonradan barışıq əldə edilib.

Sportinfo.az xəbər verir ki, Elmar Vəliyevin qardaşı, fəalliyyətini dayandırmış “Karvan“ın prezidenti Şahmar Vəliyevin Mingəçivirdəki “Azneftemaş” ASC-si məhkəməyə müraciət edərək “Aktauskiy Maşınqayırma Zavodu” TOO-ya qarşı 257 min dollarlıq iddia irəli sürüb.

Buna səbəb tərəflər arasında imzalanmış müqavilə öhdəliklərinin yerinə yetirilməməsidir. Məhkəmə ərəfəsində cavabdeh “Aktauskiy Maşınqayırma Zavodu” məhkəməyə müraciət edərək, sülh razılaşmasının təsdiqini istəyib.

Zavod ərizə və sülh razılaşması ilə məhkəməyə müraciət edib. Bildirilib ki, tərəflər arasında sülh razılaşması əldə olunub. Barışıq sazişi təsdiq edilib və iş üzrə icraata xitam verilməsi barədə qərardad qəbul edilib.

Razılaşmaya əsasən zavod hər ay Şahmar Vəliyevə 42.833 dollar ödəyəcək. “Azneftemaş” ASC Vəliyevlırin nəzarətində olan şirkətlərdən sadəcə biridir.

“Yevlax-Mərkəzi Bazar”ASC, Bakıdakı “Bakı Mexanikləşdirmə-1” ASC-nin nəzarət səhm zərfləri də Şahmar Vəliyev və oğlu Ruslana məxsusdur.

Onun oğlu, “Yeni Yevlax“FK-nı yaratmış Ruslan Vəliyev aktivləri 10 milyon dollar həcmində dəyərləndirilən “Bakı Mexanikləşdirmə-1” ASC-nin əsas səhmdarı olmaqla yanaşı, daha bir neçə şirkəti də nəzarətdə saxlayır.

Dövlət reyestr məlumatlarına əsasən, bunlar 2006-cı ildə yaradılan “R. Avadanlıq və Material Ehtiyatları” ASC, “İndependent” MMC (2001-ci il), “Bakı Mexanikləşdirmə-1” Mənzil Tikinti Kooperatividir. Vəliyevlərə məxsus daha bir neçə şirkət var.