“Neftçi” Andrey Ştoqrinlə yanaşı, Ryonosuke Ohori ilə vidalaşmağa yaxındır.

Bu ilin əvvəlində bakılılarla 6 aylıq müqavilə imzalayan, iyulda isə kontraktı 2 il müddətinə uzadan yaponiyalı legioner ölkəmizdən ayrılmaq ərəfəsindədir.

Asiyalı yarımmüdafiəçi klub tərəfindən ona verilən xidməti avtomobili geri qaytarıb. O, həmçinin kirayə tutulan mənzili boşaltmağa hazırlaşması barədə rəsmiləri məlumatlandırıb.

«Neftçi» funksionerləri yeni mövsümdə xidmətindən istifadə etməyəcəyi Ryonosuke Ohoriyə bundan öncə təklif irəli sürüb. Ondan icarə əsasında «Şamaxı»ya yollanması istənilib.

Bakılılar bu keçidin baş tutması üçün yaponiyalı yarımmüdafiəçinin maaşının bir hissəsini ödəməyə də razıdır.

Paytaxt təmsilçisi asiyalının adını iştirak ərizəsinə daxil etməyəcək. Yəni, adıçəkilən legioner Premyer Liqa və ölkə kuboku uğrunda oyunlarda meydana ayaq basmayacaq.

Samir Abasov onun xidmətindən imtina edib. Son vaxtlar düşərgəyə bir neçə legioner qatan baş məşqçi bu dəfə yaponiyalı yarımmüdafiəçinin üstündən xətt çəkib.

Çalışdırıcı bu qənaətə Polşada gəlib. Bu ölkədə keçirilən təlim-məşq toplanışının gedişatı onda belə bir əminlik yaradıb.

Abasov hazırlıq prosesinə əsasən, asiyalıya yeni mövsümdə şans verməyəcəyini qətiləşdirib. Ohori artıq bu barədə məlumatlandırılıb.

Yaponiyalıya özünə başqa komanda tapmaq tapşırığı verilib. Yekun qərar özündən asılıdır - birdəfəlik ayrılması da, müvəqqəti getməsi də.

«Ağ-qaralar» asiyalını bu ilin yanvarında sıralarına qatıb. 24 yaşlı əcnəbi sonuncu klubu “Transinvest”in (Litva) heyətində 2024-cü ilin fevralından meydana çıxdığı 31 çempionat matçında 6 qola imza atıb.

Ryonosuke Ohori karyerası ərzində 60 rəsmi matça çıxaraq 24 qol vurub və 4 qolun ötürməsini edib. «Neftçi»də 11 oyuna çıxıb, 1 məhsuldar ötürməylə yadda qalıb.

Paytaxt təmsilçisi bu yay 14 nəfərlə vidalaşıb.

Yeqor Boqomolski, Azər Əliyev, Azər Salahlı, Yuri Matias, Rəhman Hacıyev, Höccət Haqverdi, Rüstəm Samiqullin, Robert Bauer, Rafael Quzzo, Dembo Darbo, Ervin Koffi, Filip Ozobiç, İsmayıl Zülfüqarlı və Alfa Konte «qara siyahı»da yer alıb.

SPORTİNFO.AZ