Azərbaycan millisinin sabiq futbolçusu Rüfət Dadaşov çıxışı ilə yenidən Almaniyada diqqət mərkəzinə düşüb.
Sportinfo.az xəbər verir ki, Berlin “Dinamo”sunun 35 yaşlı hücumçusu Regionalliqanın Şimal-Şərq zonasının 16-cı turunda “Babelsberq”lə səfər matçında 90+1-ci dəqiqədə vurduğu yeganə qolla komandasına qələbə qazandırıb.
Almaniya mətbuatı Dadaşovun hələ yaşlanmadığını və komandasını arxasınca apardığını yazıb:
“Rüfət “Babelsberq” səfərinin son dəqiqələrində bir daha səhnəyə çıxdı. Bu mövsüm artıq 9 qol vurub və bombardirdən cəmi 1 top geri qalır.
Bu da onu göstərir ki, Azərbaycan millisinin keçmiş oyunçusu hələ də ən yaxşı formasındadır. Onun qolçuluq bacarığı sayəsində “Dinamo” 1-ci yer uğrunda mübarizəni davam etdirir”.
“Dinamo” hazırda 32 xalla turnir cədvəlinin 3-cü pilləsində qərarlaşır.
