İqor Kostyukun rəhbərlik etdiyi “Dinamo” əsasən 4-3-3 və 4-2-3-1 sistemlərinə yaxın strukturdan istifadə edir.

Topa sahib olarkən komanda müdafiəçilər vasitəsilə aşağıdan oyun qurmağa, dayaq yarımmüdafiəçisini ilk ötürmə mərhələsinə daxil etməyə və mərkəzdə say üstünlüyü yaratmağa çalışır.

Komandanın oyun quruculuğunda Volodimir Brajko, Nikolay Şaparenko və Aleksandr Pixalyonok kimi futbolçular mühüm rol oynayırlar.

Brajko daha çox müdafiənin qarşısında yerləşərək topu qəbul edir, oyunun istiqamətini dəyişir və ikinci topları toplamağa çalışır.

Şaparenko ilə Pixalyonok isə daha irəli mövqelərdə, xətlər arasında top qəbul etmək və hücumun tempini artırmaq funksiyasını yerinə yetirirlər.

PAOK-la ilk görüşdə Kostyuk start heyətində Brajko, Pixalyonok və Şaparenkodan ibarət texniki yarımmüdafiə xəttindən istifadə etmişdi.

Cinahlarda Nazar Voloşin və Matvey Ponomarenko, hücumun önündə isə Eduardo Qerrero yer almışdı.

Sonradan Andrey Yarmolenko, Vitali Buyalski və Castin Lonveyk kimi futbolçuların meydana buraxılması “Dinamo”nun ehtiyat qüvvəsinin və hücum variantlarının kifayət qədər geniş olduğunu göstərir.

“Dinamo”nun əsas məqsədi topu mərkəzdən cinaha çıxardıqdan sonra hücumu sürətləndirməkdir. Cinah futbolçuları həm xətt boyunca irəliləyir, həm də top əks cinahda olduğu zaman cərimə meydançasına daxil olurlar.

Bu zaman cinah müdafiəçilərindən biri irəli çıxaraq meydanın enini təmin edir, digər tərəfdəki futbolçu isə daha ehtiyatlı mövqe tutur.

Ukrayna təmsilçisi topu itirdikdən sonra mümkün qədər tez əks-pressinq tətbiq etməyə çalışır. Xüsusilə Şaparenko, Brajko və Pixalyonok topun itirildiyi zonaya yaxın olduqda ilk reaksiyanı sürətli verirlər.

Məqsəd rəqibin əks-hücuma başlamasına imkan vermədən topu yenidən qazanmaqdır.

Lakin bu pressinq həmişə kollektiv və balanslı şəkildə həyata keçirilmir.

Birinci təzyiq xətti keçildikdə müdafiə ilə yarımmüdafiə arasında boşluqlar yarana bilir.

PAOK-la qarşılaşmalarda “Dinamo”nun əsas problemlərindən biri də məhz bu idi: komanda irəli çıxarkən arxada geniş sahələr buraxır, rəqib isə bir neçə sürətli ötürmə ilə müdafiə xəttinin üzərinə hücum edə bilirdi.

SPORTİNFO.AZ