Konfrans Liqasındakı təmsilçilərimizdən mübarizəyə ən tez “Zirə” başlayacaq.

“Qartallar” bu axşam “Neftçi Arena”da Xorvatiyanın köklü klublarından olan “Hayduk”u qəbul edəcək.

Split təmsilçisi tarixi ərzində 6 dəfə Xorvatiya çempionu olub, 8 dəfə ölkə kubokunu qazanıb, 5 dəfə superkuboku muzeyinə aparıb.

Beynəlxalq yarışlarda da “ağlar” zəngin təcrübəyə malikdir. 1967-ci ildə Kuboklar Kubokunda mübarizəyə başlayan xorvatlar geridə qalan 57 ildə bütün yarışlarda 208 oyun keçirib. Bu matçlarda 89 qələbə qazanılıb, 39 heç-heçə, 80 məğlubiyyət qeydə alınıb.

“Hayduk” bir dəfə Çempionlar Liqasının, bir dəfə Avropa Liqasının qrup mübarizəsində mübarizə aparıb. Sonuncu belə hal 2010 /11 mövsümünə təsadüf edib.

Həmin tarixdən bu yana ardıcıl 14 il avrokuboklara qatılan “Zirə”nin rəqibi 5 dəfə pley-off mərhələsində dayanıb.

Xorvatiya təmsilçisi hər zaman ev komandası kimi tanınıb ki, mərhələlərin keçilməsində doğma meydanda qazandığı qələbələr həlledici rol oynayıb.

Səfər qarşılaşmalarındakı nəticələr “Zirə”dəkiləri sevindirməlidir. Sonuncu dəfə 6 il əvvəl – 2019-cu ilin yayında Makedoniyada “Renova”nı udan “ağlar” o vaxtdan bu yana rəqib meydanında çıxış etdiyi 7 matçın heç birində qalib gəlməyib.

Qalatasaray (Türkiyə) – Hayduk - 2:0

Tobol (Qazaxıstan) – Hayduk - 4:1

Vitoriya (Portuqaliya) - Hayduk – 1:0

Vilyareal (İspaniya) - Hayduk – 4:2

PAOK (Yunanıstan) - Hayduk – 3:0

HB Torşavn (Farer adaları) - Hayduk – 0:0

Rujemberok (Slovakiya) - Hayduk – 0:0

Statistika da göstərir ki, mərhələ adlamaq zirəlilərin öz əlindədir. Bakıdakı matçda sərfəli nəticə qazanmaqla yekunda sevinmək mümkündür.

“Hayduk” son 2 mövsümdə Konfrans Liqasının III mərhələsində mübarizəni dayandırıb. Ümid edək ki, bu dəfə II mərhələdə eyni aqibəti yaşayacaq.

Bu axşam “Neftçi Arena”da keçiriləcək duel saat 19:30-da başlayacaq.

HƏBİB / SPORTİNFO.AZ