Azərbaycan millisi UEFA Millətlər Liqasının 1-ci turunda səfərdə Litva ilə qarşılaşacaq.

Sportinfo.az xəbər verir ki, millimizin baş məşqçisi Ayxan Abbasov qarşılaşmadan əvvəl təşkil olunan mətbuat konfransında fikirlərini bölüşüb.

“Bura Tacikistana qarşı yoxlama oyunundan sonra gəlmişik. Litva ilə matça yaxşı hazırlaşmışıq. Meydana müsbət nəticə qazanmaq üçün çıxacağıq”.

Abbasov Litvanın yaxşı təşkilatlanmış və uzun müddətdir birlikdə oynayan futbolçulardan formalaşmış komanda olduğunu deyib:

“Güclü komandaya qarşı oynayacağıq. Litva ilk matçda qələbə qazanıb. Rəqibin Avropa klublarında oynayan futbolçuları çoxdur.

Uzun müddətdir eyni heyətlə çıxış edirlər. Amma futbolçulara lazımi tapşırıqlar verilib. İnşallah, düşündüklərimizi meydanda icra edib lazımi nəticəni qazanarıq”.

Baş məşqçi sabahkı görüşün Azərbaycan üçün xüsusi əhəmiyyət daşıdığını da qeyd edib:

“Sabah bizim üçün əlamətdar gündür. Anım Günüdür. Bu gün burada olmağımızın səbəbkarları olan şəhidlərimizə, qazilərimizə, Vətən müharibəsində iştirak edən hər kəsə borcluyuq. Bu barədə futbolçularla danışığımız olub. Sabah yenə də söhbət edəcəyik”.

Xaybullayevin durumuna da aydınlıq gətirən Abbasov onun ciddi probleminin olmadığını bildirib:

“Xaybullayevdə problem yoxdur. Yorğunluğu da var idi. Fikirləşdiyimiz heyətlə plan üzrə məşq edirik”.

Abbasov "Milli komanda üçün yeni macəra başlayır. Demək olarmı ki, Ayxan Abbasov sabahdan rəsmən işə başlayır və tam məsuliyyət onda olacaq?" sualına cavabında isə bu məsuliyyətin onun üçün yeni olmadığını söyləyib:

“Milli komandada olan gündən buna hazırıq. Burada olduğumuz ilk gündən məsuliyyətimizi dərk edirik.

Biz işə U-21-də başlamışdıq. Fransa ilə oyundan öncə isə əsas millidə vəzifəyə gəldik. Yuxarı qalxmaq üçün çalışmaq lazımdır”.

Litva - Azərbaycan görüşü sentyabrın 27-də keçiriləcək və Bakı vaxtı ilə saat 17:00-da başlayacaq.