Azərbaycan II Liqasında IV turun oyunları keçirilir.

İlk 3 turda məğlubiyyətlə üzləşən "Şəfa" və "Şəmkir" Binədə üz-üzə gəlib.

Bu yay fəaliyyətini bərpa edən komandaların duelindən ev sahibləri 3:2 hesablı qələbə ilə ayrılıb.

25-ci dəqiqədə Asim Quliyev cərimə meydançası həndəvərindən gözəl qolla toru silkələyib. Qonaqlar 39-cu dəqiqədə maraqlı hücum təşkil edib və yekunda Elgün Namazov hesabı bərabərləşdirib.

O, fasilədən sonra daha bir fərqlənib. Buna rəğmən, «Şəfa» oyunu yenidən öz tərəfinə çevirə bilib. Elşəm Mirzəzadə 79-cu dəqiqədə tarazlığı bərpa eləyib.

Onun vuruşunun qol olmasında Nicat Mahmudov da «pay sahibi» olub. Şəmkirlilərin qapıçısı yaxın küncə istiqamətləndirilən topu əllərinin arasından tora buraxıb.

Bundan 2 dəqiqə keçmiş İbrahim Yusifov səhnəyə çıxıb. Yarımmüdafiəçi uzaq məsafədən əla zərbəylə «doqquzluğ»u dəqiq nişan alıb.

Mövsümdə ilk qələbəsini qazanan "Şəfa" turnir cədvəlinin 12-ci pilləsində qərarlaşıb. Bütün oyunlarda uduzan üçqat ölkə çempionu "Şəmkir" isə sonuncu yerdədir.

SPORTİNFO.AZ