Ramiz Məmmədovu baş məşqçi postunda saxlaya bilməyən «Minegəçevir» rəhbərliyi çıxılmaz vəziyyətdə qalıb.
Ondan sonra kimə dəvət göndərirlərsə, mənfi cavab alırlar.
Son olaraq Elgiz Kərəmli «işıqçılar»ın təklifini geri çevirib. «Şəfa»nı I Liqanın çempionu etmiş və Premyer Liqaya çıxarmış gənc mütəxəssis maliyyə təminatı qeyri-sabit olan klubda çalışmaqdan imtina edib.
Ümumiyyətlə, çempionatda ikinci yeri tutan və Premyer Liqaya vəsiqə uğrunda pley-off matçında «Qəbələ»yə 0:2 hesabıyla uduzan «Mingəçevir» pis xəbərlərin içində boğulur.
Yönətimin kollektivə külli miqdarda borcu var. Həmin məbləğ 250 min manat həddinə yaxındır.
Pulunu ala bilməyən məşqçi və futbolçular AFFA-ya şikayət edib. Onlar borcunu ödəməkdən boyun qaçıran klubun I Liqadan uzaqlaşdırılması tələbini də irəli sürüb.
Rəhbərlik haradadır? Hərəsi bir tərəfə qaçıb gizlənib. «İşıqçılar» günün günorta çağı onları əli çıraqla axtarıb tapa bilmir. Elə federasiyanın özü də.
SPORTİNFO.AZ
