“Turan Tovuz” Dioqo Almeydadan əl çəkmir. Konfrans Liqasına vəsiqə qazanmağa yaxın olan qərb klubu bu hucumçu üçün yenidən“İmişli”nin elçi daşının üzərində əyləşib. T

ovuzlular portuqaliyalı forvardı transfer etmək istədiklərini qarşı tərəfin diqqətinə çatdırıb.

25 yaşlı qolçunun “İmişli” ilə müqavilə müddəti 2027-ci il iyunun 30-na qədərdir.

Premyer Liqanın debütantı qışdan bəri Almeydanın arxasınca düşmüş “Turan“ın təklifini qəbul etməyə hazırdır. Yeganə tələbləri təzminatın ödənilməsidir. 200 min dollar ödənilsə, bu keçidə xeyir-dua verəcəklər.

Bölgə təmsilçisi onu “Akademiko Vizeu”dan (Portuqaliya) sıralarına cəlb edib. O, karyerası ərzində ikinci dəfə Portuqaliyadan kənara üz tutub.

2017-2018-ci illərdə İtaliyada - “Empoli”nin U-19 komandasında forma geyinib. Burada 1 il oynayan Dioqo daha sonra yenidən ölkəsinə qayıdıb və “Pasuş de Ferreyra”nın U-19 komandasına keçib.

Növbəti illərdə “Benfika”, “Kovilya”, “Mafra” kimi klublarda çıxış edən hücumçu 2024-cü ilin yanvarında “Akademiko Vizeu”ya üz tutub..

Almeyda karyerası ərzində 148 oyunda 23 qol vurub, 9 məhsuldar ötürmə edib. O, hücumun mərkəzində və sağ cinahında oynaya bilir.

“Transfermarkt” portalında dəyəri 300 min avro göstərilən Almeyda 2019-cu ildə debüt etdiyi Portuqaliyanın U-20 yığmasında 2 oyuna çıxıb.

Adıçəkilən forvard “İmişli”nin ən ödənişli üzvlərindən biridir. Buradakı aylıq maaşı 9000 dollardır.

SPORTİNFO.AZ