Ehtiiram Quliyev çempionluq üçün mübarizə aparacaqlarını açıqlayıb 4 ay öncə.
Onun qızıl medal gözlədiyi «Turan Tovuz» üç turdur Premyer Liqada qələbə qazana bilmir.
Dünən də «Neftçi»ni Tovuzda üstələməyi bacarmadılar. Kurban Berdiyev xal itkisinə məruz qaldıqlarını iddia etdi oyundan sonra.
O, ya özünü dolayır, ya da rəhbərini.
Berdiyevin yerli ictimaiyyətlə işi yoxdur, onları bu söhbətin içinə qatmayaq.
Əlbəttə, «Baba» Tovuzun futbol publikasına sayğı ilə yanaşsaydı, komandanı götürüb Bakıya aparmazdı. Yalnız oyundan-oyuna Tovuza dönən «Turan» artıq rayon əhli üçün yadlaşan doğmadır.
Çempionluq mücadiləsi verən komanda qorxaq futbol oynamır. 90 dəqiqə ərzində böyük qüvvə ilə müdafiəyə qapanmır, tez-tez hücum edir.
Gözü zirvədə olan baş məşqçi futbolçularından yalnız topu irəli vurmağı istəmir. O, standart epizodlardan qol vurulacağına ümid edib qalmır, əlinə təsbeh götürüb, bir tək ilahi qüvvənin yardımına ümid bağlamır.
Ehtiram Quliyevə məsləhət görərdik ki, nə qədər gec deyil, baş məşqçi məsələsinə zaman ayırsın, problemi həll eləsin.
Gördüyü işlərə, çəkdiyi xərcə və əziyyətə heyfi gəlsin - Kurban Berdiyev onu çempionluq arzusuna çatdırmayacaq.
O, hələ də inanırsa ki «Baba» ilə hədəfə çatacaq, deməli, ya həqiqətən xəyalpərəstdir, ya da təkbaşına qərar verməyə acizdir.
MUSA
