"Turan Tovuz"un yarımmüdafiəçisi Ayxan Hüseynov Premyer Liqanın 13-cü turunda "Neftçi" ilə qolsuz bərabərliklə bitən matçdan sonra Sportinfo.az-a müsahibə verib

- Oyun barədə nələr deyə bilərsən?

- Bir qolluq oyun idi. Hansı tərəf fərqlənə bilsə o da oyunu aparacaqdı. Bu da heç bir tərəfdə alınmadı. Bizim yaxşı imkanlarımız oldu, amma bir az bəxtimiz gətirmədi. Əslində rəqibin də müəyyən fürsətləri olduğunu deməliyəm.

- Ardıcıl üçüncü oyunda da qələbə qazana bilmədiniz. Səbəb nədir?

- Problemi tam da bilmirəm. Oyuna yaxşı hazırlaşırıq, analizlər olur, motivasiya yerində olur. Bir az bəxtimiz gətirmir. "Araz-Naxçıvan"la oyunda da imkanlarımız oldu, bu gün də. Sadəcə nöqtəni qoya bilmədik. Belə şeylər fubolda olur. Marafon uzundur. Hər dəfə qələbə qazanmaq olmur. Bəzən belə çətin mərhələdən keçməlisən. İnşallah, bunu da arxada qoyacağıq.

- Rəqib oyunçular meydanın örtüyündən şikayət etdi. Narazılıqları haqqlı hesab edirsən?

- "Şamaxı" ilə oyunla müqayisə etsək indi daha yaxşı idi. Amma yenə də gözləmək lazım olduğunu deməliyəm. Ot dağılanda bizə narahatlıq verir. Topa saxlamaq çətinləşir.

- Samir Abasovsuz "Neftçi" sizi nə ilə təəccübləndirə bildi?

- Elə çox şey dəyişməmişdi. Sadəcə Abubakarla Sambunun eyni anda meydanda olmasını qeyd edə bilərəm. Həmişəki "Neftçi"dir. Çətin oyun oldu. Məncə, "Neftçi"də də bəxt gətirmir. Yaxşı oyunlar keçirirlər. Sadəcə sonluğu gətirə bilmirlər.

XANOĞLAN İMANOV