Üç tura 6 xal pis göstərici sayılmamalıdır.

Hələ Premyer Liqada mövsümün əvvəlidir və startın necəliyi bütün hallarda vacibdir.

Ehtiram Quliyev tabloya və turnir cədvəlinə baxıb «Turan Tovuz»un nəticələrinə sevinə bilər. Bu, onun doğal haqqıdır.

Çünki rəqəmlər üzərindən baxsaq, hər şey yaxşıdır, ideala yaxındır. Üzünü meydana tərəf çevirsə… Gərək ki, qanı qaralsın, əhvalı korlansın.

«Turan» yaxşı futbol oynamır. «Neftçi» üzərində qələbəyə də sevinməyə dəyməz. Kenan Piriç o bağışlanmaz xətanı etməsəydi, tovuzlular, böyük ehtimalla, Bakıdan 3 xalla dönməyəcəkdi.

Oyunun gedişində 10 nəfərlə qalan ev sahiblərinə qarşı müdafiə olunmaq nə deməkdir?

Dünyanın ulduzları yığ tök bura, Kurban Berdiyev tutduğunu buraxmayacaq. «Baba»nın «Turan»a futbol oynatdırmaq fikri yoxdur və bunu Ehtiram Quliyevin anlaması lazımdır.

Deyib ki, qarşıdakı günlərdə daha 2-3 transfer edəcəklər. Çox nahaq! Pulu belə artıq düşübsə, onu uşaq futboluna yönəltsin.

Klubun akademiyasının yalnız adı var, uşaqlar köhnə «kos»un ümidinə qalıblar. Bir də sərxoş vəziyyətdə stadiona gələn bəzi məşqçilərin.

Nə «Turan Tovuz» Yunanıstan yığmasıdır, nə də Kurban Berdiyev Otto Rehagel. İllər qabaq almaniyalı məşqçi yunanları eynən ultra praqmatik futbolla Avropa çempionu eləmişdi.

Nətəhər ki, Berdiyev hazırda «Turan»ı bu yolla irəli aparmaq istəyir.

Onda Rehageldə alınmışdı, çünki rəqiblər Yunanıstan yığmasına ciddi nəzərlə yanaşmırdılar. Bizim Premyer Liqa fərqlidir və təsadüf bir dəfə olur:

indi «Baba» nə etsə belə (halbuki belə bir niyyəti htss olunmur), «Turan»ı çempionluq yarışmasının mərkəzində saxlaya bilməz.

MUSA