Portuqaliyalı keçmiş hakim Duarte Qomeş “A Bola” nəşrinə maraqlı açıqlama verib.
Sportinfo.az xəbər verir ki, o, 2006-cı ildə Kiprin Larnaka şəhərində 19 yaşadək futbolçulardan ibarət Azərbaycan və Ermənistan yığmaları arasında keçirilmiş Avropa çempionatının seçmə mərhələ oyununu xatırlayıb.
Sabiq FIFA referisi baş verən insidentlərə görə matçı bir neçə dəfə dayandırmaq məcburiyyətində qaldığını bildirib:
“Tribunalardakı aqressiya hər iki komandanın üzvlərinə sirayət etmişdi. Neytral meydanda keçirilən görüşlə bağlı mübahisə və müzakirələr qaldığımız otelə qədər gəlib çatmışdı”.
Həmin qarşılaşmada Azərbaycan yığması Ermənistan üzərində 2:1 hesablı əzmkar qələbə qazanmışdı..
