Bilindiyi kimi, 17 yaşadək futbolçulardan ibarət Azərbaycan millisinin oyunları təxirə salınıb.
Sportinfo.az xəbər verir ki, buna səbəb yığmamızın 3 futbolçusunun koronavirusa yoluxmasıdır.
Avropa çempionatının seçmə mərhələsində çıxış etmək üçün Belçikada səfərdə olan U-17-nin heyətində Həmzəalı Mikayılov (“Sabah”), Adəm Topalov (“Səbail”) və İbrahim Ağayarovun (“Qarabağ”) COVID-19 testi pozitiv nəticələnib ki, Belçikanın daxili qanunlarına əsasən komandamızın digər üzvlərindən daha bir dəfə test götürüləcək.
Təqvimə əsasən, bu gün keçirilməsi nəzərdə tutulan Azərbaycan - Norveç oyunu qeyri-müəyyən müddətə təxirə salınıb.
“Dünəndən komandamızı karantinə alıblar. Heç yerə çıxmağa icazə verilmir. Qapıdan çölə çıxacağımız halda polis çağırılacağı bildirilib”.
Bu sözləri newsport.az-a açıqlamasında millinin baş məşqçisi Aqil Nəbiyev deyib. Çalışdırıcı bunun futbolçulara pisxoloji olaraq pis təsir etdiyini bildirib:
“Səhər yeməyimizi də otağımıza gətirdilər. Oyunçular psixoloji təzyiq altındadır. Otaqdan çıxa bilmirik.
Bu gün Bakı vaxtilə saat 13:00-da oyunumuz olmalıydı, amma təxirə salındı. Bir azdan bizdən yenə test götürəcəklər”.
