“Payız aylarından başlayaraq şəhərə ilk köçü planlaşdırırıq, Ağdama qayıdırıq”.

Bu sözləri Prezidentin xüsusi nümayəndəsi Emin Hüseynov deyib.

O bildirib ki, vətəndaşlarımız artıq doğma dədə-baba torpaqlarına köçürlər: “Ruhlar şəhəri və Qafqazın Xirosiması adlandırılan, tamamilə dağıdılmış, viran qoyulmuş Ağdamımızda artıq belə anlara şahidlik edirik. Ağdam ətrafındakı 3 kəndə vətəndaşlarımız artıq köçüb. Şəhər bərpa olunur, infrastruktur işləri sürətlə davam edir. Ağdamda artıq avtovağzal, dəmiryolu vağzalı kompleksi də var. Bu, Ağdama olan səfərlərin daha əlverişli şəraitdə keçirilməsinə şərait yaradacaq.

Növbəti ilin sonuna qədər şəhərimizin tarixi-mədəni mərkəzi tam bərpa olunacaq. Gözəl günlər bizi gözləyir. Bu qatarla Ağdama gələndə hər dəfə yeniliklər görəcəksiniz”,- E. Hüseynov qeyd edib.

ADY sədrinin müavini Nicat Quliyev də səfərlə bağlı fikirlərini bölüşüb.

“Prezident İlham Əliyevin bu ayın əvvəlində ABŞ-yə səfəri çərçivəsində Ermənistanın ərazisindən keçməklə Naxçıvanla birbaşa əlaqəni təmin edəcək nəqliyyat xəttinin tikintisi barədə razılıq əldə edilib.

Zəngəzur dəhlizinin yaradılmasını zəruriləşdirən bu tarixi uğur bizim işimizi stimullaşdırır. Horadiz-Ağbənd xəttinin tikintisini tez bir zamanda tamamlanması və Ermənistan sərhədinə çatdırılması üçün böyük səylə çalışırıq.

Artıq qardaş Türkiyə Respublikasında da Naxçıvanla sərhəddə Zəngəzur dəhlizinə birləşəcək Qars-Iğdır-Aralıq-Dilucu dəmiryol xəttinin təməli qoyulub. Bu baxımdan, Naxçıvanın dəmiryol infrastrukturunun bərpası ölkəmizin ali rəhbərliyi tərəfindən prioritet məsələ elan edilib və ADY olaraq ən qısa zamanda bu istiqamətdə işə başlamağı planlaşdırırıq”, - o bildirib.