Azərbaycan II Liqasında XV tura start verilib.

"Ağdaş" doğma rayonda "Şəki Siti"ni qəbul edib.

Hesab erkən açılıb. Fuad Hüseynov 5-ci dəqiqədə əlaa təşkil olunmuş hücumu qolla tamamlayıb.

Qonaqlar bu epizodda ofsayd olduğunu iddia eləsə də, referi Vüqar Həsənli onların haray-həşirinə əhəmiyyət verməyib.

Fasiləyə bir qədər qalmış (40-cı dəqiqə) Yusif Dilanov «Şəki»ni azlıqda qoyub. Baş hakim onun rəqibin ayağını tapdalamasını əsas gətirərək, cibindən qırmızı vərəqə çıxarıb.

Buna rəğmən, Şəki təmsilçisi 65-ci dəqiqədə hesabı bərabərləşdirib. Elşən Mustafayev cərimə meydançasının həndəvərindən qapının uzaq küncünü dəqiq nişan alıb.

«Ağdaş» stadiona toplaşmış 350 azarkeşin dəstəyi ilə ard-arda hücumlar təşkil edib. Azı 4-5 qol vəziyyəti yaratsalar da, heç birindən yararlanmayıblar.

Hətta son dəqiqədə ən real fürsəti boşa veriblər. Beləcə, qarşılaşma 1:1 hesablı bərabərliklə başa çatıb.

"Şəki"nin 2024-cü ilə problemlərlə qədəm qoyduğu burada məlum olub. Belə ki, komanda ötən 2 ayda ciddi dəyişikliyə uğrayıb, xeyli sayda futbolçu düşərgəni tərk edib.

Qalanlarını barmaqla saymaq mümkündür. Təsadüfi deyil ki, qonaqlar Ağdaş səfərinə cəmi 12 futbolçu ilə çıxıb və 90 dəqiqə ərzində əvəzetmə hüququndan istifadə eləməyib.

15 turdan sonra 24 xal toplayan "Şəki Siti" turnir cədvəlinin 7-ci pilləsində qərarlaşıb. 16 xalı olan "Ağdaş" isə 9-cu yerdədir.

SPORTİNFO.AZ