II Liqada 18-ci tur arxada qalıb.
Qızıl medal şansını davam etdirən «Füzuli» Bakıda «Ağdaş»ı qarşılayıb.
«ASK Arena»da baş tutan matç nominal ev sahiblərinin 5:0 hesablı qələbəsi ilə tamamlanıb. Birincilər bundan razı qalmaya bilər, niyə də yox?!
Şansızlıq üz verməsəydi, hesab 10:0, 15:0 olmalıydı. Füzulilər hər iki hissədə o qədər qol epizodunu havaya sovurdu ki…Saya gəlməz, hesaba gəlməz!
Ağdaşın bostanabənzər stadionuna öyrəşmiş Ruslan Hüseynovun drujinası «ASK Arena»nın süni qazonunda olduqca miskin göründü.
Müdafiədə yol verilən səhvlər bir kənara, «Füzuli» onları topla elə də «döydü», belə də «döydü».
Qarabağlılar özlərinə bir balaca ciddiyət, bir balaca da əziyyət versəydilər, «Ağdaş» hər iki dəqiqədənbir qapısından top çıxaracaqdı.
Qış fasiləsində «Cəbrayıl»dan gəlmiş Elvin Nəsibov het-trikə imza atdı. Emin Quliyev və Məhəmməd Bədəlbəyli hərəyə bir dəfə fərqləndi.
Mirkamil Əliyev bu dəfə qol vurmadı, ancaq ki, onun 86-cı dəqiqəyə təsadüf edən epizodunu izləməyi hər kəsə məsləhət bilirəm.
«Neftçi»nin yetirməsi topla elə bir junqlyorluq elədi ki, Lionel Messi onun yanında yalan oldu. Rəqibin müdafiəçilərini tək-tək keçdi, qalanlarını qapının önündə sıraya düzdü, son zərbəni vurmağa isə 1 saniyə gecikdi.
Qələbə qrafasında 12 rəqəminə çatan «Füzuli» 41 xalla turnir cədvəlinin ikinci pilləsində özünü rahat hiss edir. 19 xala malik «Ağdaş» 10-cı sırada «yuxuya dalıb».
SPORTİNFO.AZ
“ASK Arena”. 50 tamaşaçı |
|
|
||
|