II Liqada növbəti baş məşqçi istefası 18-ci turda qeydə alındı.

«Şahdağ» Bəhram Şahquliyevlə vidalaşdı.

Bu, İmişlidə gerçəkləşdi. «Kür-Araz»ın qonağı olan Qusar təmsilçisi meydanı bərbad vəziyyətə düşmüş məkanda heç nəylə yadda qalmadı.

Dərə-təpə qazonda başını itirən qonaqlar topu ayağında saxlaya bilmirdi. İlk qol da onların qapısına bu cür vuruldu.

Ramazan Abbasovun ustalığını da qeyd etməsək olmaz. «Bakı»nın yetirməsi cərimə meydançasının xətti üzərindən topa bir güclü zərbəsiylə Rafiq Kərimovun qapısına yol tapdı.

İkinci qolda da Ramazanın xidmətini önə çəkməliyik. Onun Rubin Seyidovun ayağından «oğurladığı» top Cavid İmamverdiyevin önünə düşdü və sonuncu rəqib qapıçısını məyus eləməyə çətinlik çəkmədi.

79-cu dəqiqədə «Şahdağ» fərqi azaltdı. Mirabbas Mirbabayevin kobudluğu və təyin olunan penalti qusarlıları ümidləndirdi.

Salman Atluxanov 83-cü dəqiqədə ikinci «sarı»dan qırmızı vərəqə aldı, «Kür-Araz» da say üstünlüyünü dəyərləndirdi. Elariz Xəlilli fərqləndi, salto vurdu, stadionu ayağa qaldırdı.

90+4-cü dəqiqədə Mübarək Şahquliyev ev sahiblərindən Müseyib Vəlizadəyə «qırmızı» aldırsa da, bu, «Şahdağ»a təsəlli də olmadı.

Çempionluq yolunda növbəti dəfə büdrəyən şimal təmsilçisinin rəhbərliyi çalışdırıcısını elə paltardəyişmə otağında istefaya göndərməyə gərək duydu.

Baş hakim Şamil İmanzadə İmişlidə əlini 17 dəfə cibinə atdı. Onun 15-də sarı kart göstərdi. Bu isə II Liqanın anti-rekordudur.

SPORTİNFO.AZ